Liðin hafa núna bæði lokið upphitun og það styttist í það að þau gangi inn á völlinn.

Núna snýst þetta um að slökkva í þessum áhorfendum. Við höfum áður gert það hér í Tyrklandi.

Svona var staðan þegar okkar menn komu út í upphitun Liðin eru bæði á fullu að hita upp. Stuðningsmenn Tyrklands bauluðu bara enn meira og enn hærra þegar okkar menn komu út í upphitun.

Læti! pic.twitter.com/VyoBclItwH

— Guðmundur Aðalsteinn Ásgeirsson (@gummi_aa) September 9, 2024

Vonarstjarnan vinsæl Arda Guler fær rosalega móttökur frá öllum hliðum vallarins. Nafn hans er sungið hástöfum. Hann fer og heilsar. Ótrúlega vinsæll hérna.

Stærstu stjörnurnar byrja hjá Tyrkjum Byrjunarlið Tyrklands fyrir leikinn gegn Íslandi hefur verið opinberað. Tyrkir voru með einhvern leikþátt í gangi í upphafi æfingarinnar í gær þar sem Arda Güler labbaði um með sjúkraþjálfara.

Hann hefur náð ótrúlega skjótum bata og er klár í að byrja leikinn. Fyrirliðinn Hakan Calhanoglu, fyrirliði liðsins, kemur þá inn í byrjunarliðið eftir að hafa byrjað á bekknum gegn Wales á föstudag.

1. Mert Gunok (m)
3. Merih Demiral
7. Kerem Akturkoglu
8. Arda Guler
9. Umut Nayir
10. Hakan Calhanoglu
13. Eren Elmali
14. Abdulkerim Bardakci
16. Ismail Yuksek
17. Irfan Can Kahveci
18. Mert Muldur

Engin smá læti Núna er búið að bæta í áhorfendaskarann og það eru engin smá læti þegar markverðir Íslands mæta út í upphitun. Tyrkirnir baula og baula. Hér er ekkert til sem heitir virðing, gleymum því.

Þrjár breytingar frá sigrinum gegn Svartfjallalandi Age Hareide, landsliðsþjálfari Íslands, gerir þrjár breytingar á byrjunarliðinu frá sigrinum gegn Svartfjallalandi síðasta föstudag.

Guðlaugur Victor Pálsson og Kolbeinn Birgir Finnsson byrja í bakvörðunum og Andri Lucas Guðjohnsen byrjar á toppnum. Orri Steinn fer á bekkinn rétt eins og Alfons Sampsted og Logi Tómasson.

Reynsluboltarnir Gylfi Þór Sigurðsson og Jóhann Berg Guðmundsson halda sæti sínu þrátt fyrir að mjög stutt sé á milli leikja.

Svona er byrjunarlið Íslands

Hvernig verður þetta eiginlega á eftir? Það voru svo auðvitað mikil fagnaðarlæti þegar leikmenn Tyrklands komu út á völlinn. Ótrúlegur hávaði sem þessir áhorfendur geta búið til. Ég myndi segja að leikvangurinn sé bara um 20-30 prósent fullur núna. Hvernig verður þetta eiginlega á eftir?

Tyrknesku áhorfendurnir hafa engan húmor fyrir því að íslenska liðið sé mætt út á völl. Eru farnir að baula heldur kröftulega.

Íslensku strákarnir mættir út að skoða aðstæður og það má heyra smá baul. Þessir tyrknesku áhorfendur eru ekkert að leika sér.

Fyrirfram er þetta líklega erfiðasti leikurinn í riðlinum. Það verður gaman að sjá hvernig íslenska liðið kemur út úr þessu, alvöru próf!

Byrjar mjög seint Þá er maður mættur á völlinn og áhorfendur eru líka farnir að tínast inn. Það eru rúmir tveir tímar í leik en flautað verður til leiks klukkan 21:45 að staðartíma og verður þetta búið um miðnætti. Hitinn er búinn að vera allsvakalegur í dag.

Reynsla sem maður strikar af 'bucket-listanum' Ég er mjög spenntur að fara á völlinn í kvöld. Að fara á fótboltaleik í Tyrklandi er eitthvað sem maður strikar af 'bucket-listanum' sem fótboltaáhugamaður. Fótboltaðadáendur hér í landi eru ótrúlega háværir og lifa sig inn í hlutina. Völlurinn sem spilað er á í kvöld er ekki sá stærsti og komast færri að en vilja.

Stutt á milli leikja - Verða margar breytingar?
Age Hareide, landsliðsþjálfari, sagði á fréttamannafundi í gær að það væru allir klárir. Við spáum því að það verði samt sem áður fjórar breytingar á byrjunarliðinu þar sem það er svo stutt á milli leikja.

Við spáum því að það verði bakvarðabreytingar; Guðlaugur Victor Pálsson komi í hægri bakvörðinn fyrir Alfons Sampsted og Kolbeinn Birgir Finnsson í vinstri bakvörðinn fyrir Loga Tómasson.

Þá komi Willum Þór Willumsson á hægri kantinn fyrir Mikael Anderson og Andri Lucas Guðjohnsen upp á topp fyrir Orra Stein Óskarsson. Orri gerði fyrra markið í síðasta leik en það hefur heyrst að planið hafi verið að þeir myndu skipta leikjunum á milli sín og mögulega hentar leikurinn betur fyrir Andra á morgun.

Svo er spurning hvort Arnór Ingvi Traustason komi inn en hann var tæpur fyrir síðasta leik. Stefán Teitur Þórðarson og Jóhann Berg Guðmundsson léku frábærlega saman á miðsvæðinu gegn Svartfjallalandi. Það verður fróðlegt að sjá hvort reynsluboltarnir Jóhann Berg og Gylfi Þór Sigurðsson geti byrjað annan leikinn í röð.

Líka hægt að mæla með hlustun á útvarpsþættinum!

Nóg að lesa fyrir leikinn

Að sjálfsögðu er uppselt á leikinn
Það er að sjálfsögðu uppselt á leikinn í kvöld.

Leikurinn í kvöld fer fram í Izmir, sem er þriðja fjölmennasta borg Tyrklands. Hér er mikill hiti, um 30 gráður, en það er stutt í sjóinn og golan er nokkur.

Það verður spilað á Gürsel Aksel Stadium, heimavelli Göztepe. Völlurinn tekur tæplega 20 þúsund manns í sæti og er auðvitað uppselt. Fólk stóð í röðum í gær að kaupa miða á leikinn.

Þá verða 44 blaðamenn á leiknum - þar á meðal frá Fótbolta.net - og 22 ljósmyndarar.

Myndir frá æfingu í gær Undirritaður er staddur í Izmir í Tyrklandi og tók þessar myndir á æfingu Íslands á leikvellinum í Göztepe í gær.

Ísland verið kryptónít Tyrklands „Við vitum af sögunni," sagði Vincenzo Montella, þjálfari Tyrklands, á fréttamannafundi í gær. Saga Ísland og Tyrklands í landsliðsfótbolta er mjög áhugaverð svo ekki sé meira sagt.

Og eins og Montella segir, þá er hann meðvitaður um söguna.

„Við höfum spilað 13 sinnum gegn þeim og aðeins unnið tvisvar. Við vitum að þetta verður mjög erfiður leikur en við unnum síðast gegn þeim fyrir níu árum."

Tyrkland er 18. fjölmennasta þjóð í heimi með meira en 87 milljónir íbúa. Ísland á sama tíma er 179. fjölmennasta þjóð heims með tæplega 400 þúsund íbúa. Samt sem áður hefur Ísland verið með gott tak á Tyrklandi í fótbolta í gegnum árin.

Svo virðist sem Ísland sé ákveðið kryptónít fyrir Tyrkland í fótbolta, ólukkulið þeirra.

Eins og Montella bendir á, þá hafa þessar þjóðir mæst 13 sinnum og Tyrkland hefur aðeins unnið tvisvar. Liðin mættust fyrst 1980 í einmitt Izmir - þar sem leikurinn á morgun fer fram. Janus Guðlaugsson kom Íslandi yfir og bættu Albert Guðmundsson og Teitur Þórðarson við mörkum í seinni hálfleik. Fatih Terim skoraði mark Tyrklands úr vítaspyrnu en leikurinn endaði með 1-3 sigri Íslands.

Lárus Guðmundsson og Atli Eðvaldsson gerðu svo mörkin í 2-0 sigri Íslands ári seinna. Sá leikur var á Laugardalsvelli.

Liðin gerðu 1-1 jafntefli í Istanbúl 1988 og Ísland vann 2-1 sigur árið eftir þar sem Pétur Pétursson gerði bæði mörkin. Arnór Guðjohnsen gerði þá fernu í 5-1 sigri Íslands á Tyrkjum árið 1991.

Fyrsti sigur Tyrkja á Íslandi var stór en hann kom 1994 í Istanbúl, 5-0 var lokastaðan þar.

Ísland hefur alls unnið átta sigra á Tyrklandi og er því með tæplega 62 prósent sigurhlutfall í leikjum gegn þeim. Frægustu sigrarnir eru líklega þeir sem hafa komið á síðustu árum; líklega er sá frægasti 0-3 sigur í Eskisehir sem kom Íslandi langleiðina á HM 2018.

Annar leikurinn í Þjóðadeildinni Ný útgáfa af Þjóðadeildinni hófst síðasta föstudag þegar Ísland mætti Svartfjallalandi á Laugardalsvelli. Sá leikur endaði með 2-0 sigri Íslands.

Núna er komið að næsta prófi og verður það líklega talsvert erfiðara. Tyrkland gerði markalaust jafntefli við Wales í fyrsta leik sínum og Ísland er því á toppi riðilsins.

Staðan í riðlinum:
1. Ísland - 3 stig
2. Tyrkland - 1 stig
3. Wales - 1 stig
4. Svartfjallaland - 0 stig

Við þurfum að bera virðingu fyrir þessari keppni en hún hefur tvisvar hjálpað okkur að komast í umspil fyrir stórmót.

Kveðjur frá Izmir Góðan daginn kæru lesendur og verið velkomnir í beina textalýsingu frá leik Tyrklands og Íslands í Þjóðadeildinni!