Liðin ganga út á völl Liðin ganga út á völl við intro-ið af Game of Thrones. Viðeigandi þar sem það verður hart barist í dag.

Styttist í að þetta fari af stað Rúta með Njarðvíkinga er runnin í hlað og þeir eru að koma sér fyrir í stúkunni. Fyrst um sinn virðist þetta ætla að vera græn stúka hérna í dag.

Spámaðurinn Viktor Jónsson, markahæsti leikmaður Lengjudeildarinnar í fyrra og í dag markahæsti leikmaður Bestu deildarinnar, spáir í spilin.

Grindavík 1 - 2 Njarðvík
Eins mikla trú og ég hef á mínum manni Halla Hróðmars þá held ég að Njarðvíkingar séu aldrei að fara tapa þessum leik, sama hverju er kastað í þá. Þeir vinna leikinn og tryggja sér sæti í umspilinu. Ármann Ingi þakkar Grindvíkingum fyrir sig og kemur þeim yfir.

Innbyrðis viðreignir Samkv. vef KSÍ hafa þessi lið 12 sinnum mæst í mótsleik á vegum KSÍ.

Njarðvík hefur unnið fjórum sinnum (33%).
Grindavík hefur unnið átta sinnum (67%).
Liðin hafa aldrei skilið jöfn.

Njarðvíkingar hafa skorað 23 mörk í þessum einvígjum og Grindavík hafa skorað 24.

Allt undir fyrir gestina Sömu sögu er hinsvegar ekki hægt að segja um gestina frá Njarðvík. Þeir standa frammi fyrir því að eiga möguleika á sögulegum árangri í sinni sögu. Þeir eru þegar búnir að jafna sinn besta árangur í sögunni sem er 6.sætið í næst efstu deild. Sigri Njarðvíkingar í dag er ljóst að þeir bæta sinn besta árangur í sögunni og um leið tryggja sig í umspilið um sæti í efstu deild.

Njarðvíkingar hafa eytt öllu tímabilinu í baráttu við toppinn eða í umspilsæti svo það yrði vafalaust svekkelsi í Njarðvík ef þeir myndu enda tímabilið fyrir utan umspilsæti.

Eftir frábæra byrjun á tímabilinu og lengst af verið það lið sem hafi skorað mest í sumar hefur gengið aðeins erfiðlegra að skora mörkin seinni part móts. Njarðvíkingar hafa skorað 32 mörk í sumar.

Mörk Njarðvíkinga hafa raðast á:

Dominik Radic - 11 mörk
Oumar Diouck - 8 mörk
Kaj Leo Í Bartalstovu - 5 mörk
*Aðrir minna

Lítið undir fyrir heimamenn Grindvíkingar hafa að litlu að keppa í dag. Þeir geta mest lyft sér upp í 7.sætið í deildinni. Grindavík hafa þó verið að malla inn stigum í síðustu umferðum ef frá er talið skellurinn gegn ÍBV í síðustu umferð þar sem þeir töpuðu með sex mörkum gegn engu.

Grindavík hafa verið öflugir fyrir framan markið og skorað næst mest allra liða í deildinni í sumar eða 38 mörk. Aðeins Eyjamenn hafa skorað meira eða 49 mörk.

Markahæstu menn Grindavíkur:

Dagur Ingi Hammer Gunnarsson - 10 mörk
Kwame Quee - 5 mörk
Josip Krznaric - 4 mörk
Einar Karl Ingvarsson - 3 mörk
Adam Árni Róbertsson - 3 mörk
*Aðrir minna

Lokaumferðin Baráttan um efsta sætið er milli ÍBV og Fjölnis fyrir lokaumferðina í deildinni. Fjölnir eiga erfitt verkefni fyrir höndum en þeir fara suður með sjó og etja kappi við Keflavík í lokaumferðinni á meðan ÍBV fara í Breiðholtið og heimsækja Leikni R. sem hafa að litlu að keppa.

Baráttan um tvö síðustu umspilsætin er svo milli ÍR (35 stig), Aftureldingar (33 stig) og Njarðvíkur (32 stig).
ÍR og Afturelndig eigast við í Mosfellsbæ innbyrðis svo það gæti orðið hreinn úrslitaleikur ef Njarðvíkingar hafa betur í Safamýrinni gegn Grindavík. Það er því mikil spenna á efri hluta töflunnar.

Það er þegar ljóst að Grótta og Dalvík/Reynir falla í 2.deild.

Lokaumferðin

Dalvík/Reynir - Þróttur R.
Leiknir R. - ÍBV
Afturelding - ÍR
Keflavík - Fjölnir
Grindavík - Njarðvík
Grótta - Þór Ak.

Dómarateymið Gunnar Oddur Hafliðason dæmir þennan leik og honum til aðstoðar verða Daníel Ingi Þórisson og Magnús Garðarsson.
Eftirlitsmaður KSÍ er Ingvar Örn Gíslason.

Heil og sæl! Verið hjartanlega velkomin í þessa þráðbeinu textalýsingu frá síðustu umferð Lengjudeildarinnar 2024.
Grindavík taka á móti nágrönnum sínum frá Njarðvík á Stakkavíkurvellinum í Safamýri þar sem allt er undir fyrir gestina.