SKÝRSLAN: Afturelding með annan fótinn á Laugardalsvöll
Hvað réði úrslitum?
Þetta var frekar jafn leikur sem bar þess merki að það var mikið undir. Bæði lið fengu færi en það voru heimamenn í Aftureldingu sem nýttu sín. Fjölnismönnum gekk ekki nógu vel að hitta á markið og þegar þeir gerðu það þá stóð Jökull fastur fyrir í markinu. Einstaklingsgæði fram á við hjá Aftureldingu skilaði miklu í dag.
Bestu leikmenn
1. Elmar Kári Enesson Cogic (Afturelding)
Elmar var virkilega góður í þessum leik, skoraði gott mark og skapaði heilmikið. Hann hefði getað verið með 2 mörk þar sem hann klúðraði víti en heilt yfir mjög góður leikur.
2. Sigurpáll Melberg Pálsson (Afturelding)
Sigurpáll skorar algjörlega stórkostlegt mark til þess að auka forystu Aftureldingar í 2 mörk. Hann var einnig mjög hættulegur úr föstum leikatriðum og hefði getað skorað eitthvað úr þeim með smá heppni.
Atvikið
Elmar Kári fær sitt annað gula spjald á loka sekúndu leiksins að því virðist viljandi. Virkilega athugavert atvik en ég hvet lesendur til þess að lesa greinina " Rugluð atburðarás í Mosó - Fékk viljandi rautt til að ná úrslitaleiknum" ef þeir vilja lesa meira. Elvar Geir fer þar ýtarlega í þetta allt saman.
Hvað þýða úrslitin?
Afturelding fer með gríðarlega mikilvægt tveggja marka forskot inn í seinni leik liðanna sem verður spilaður í Grafarvoginum á mánudaginn klukkan 15:45.
Vondur dagur
Máni Austmann er markahæsti leikmaður Fjölnis og á að vera þeirra hættulegasti maður fram á við. Ég man varla eftir honum úr þessum leik, sem segir held ég bara allt sem segja þarf.
Dómarinn - 6
Þórður og hans teymi voru heilt yfir fínir í þessum leik. Fyrra gula spjaldið sem Elmar fær dregur hann hinsvegar niður þar sem mér finnst það rosaleg illa vegið að honum. Svo er spurning hvort Afturelding hefði átt að fá víti í fyrri hálfleik en þar er ég ekki alveg viss.