SKÝRSLAN: Fylkir vann hornspyrnukeppnina en Fram fótboltaleikinn
Hvað réði úrslitum?
Framarar voru einfaldlega betri fyrir framan mark andstæðinganna en Fylkismenn, Fram fékk fá færi en skoraði tvö mörk á meðan að Fylkir var látlaust í sókn megnið af leiknum en skapaði hvorki nóg af góðum færum og klúðraði þeim sem þeir fengu.
Bestu leikmenn
1. Fred (Fram)
Hérna langar mig einhvernveginn að velja alla varnarlínu Fram líka því þeir stóðu af sér storminn allan leikinn, Fred lagði upp fyrsta markið, var gríðarlega duglegur og er ógeðslega góður í fótbolta.
2. Djenairo Daniels (Fram)
Mér fannst þessi stóri og stæðilegi sóknarmaður frábær, hann snéri af sér Fylkismenn eins og þeir væru skólataska á bakinu á honum trekk í trekk, hélt boltanum vel og skapaði mikla hættu. Besti leikur sem ég hef séð hann spila fyrir Fram.
Atvikið
2-0 markið sem Birkir Eyþórs gefur á silfurfati rétt fyrir hálfleikinn, það var rándýrt og gerði róður Fylkismanna talsvert þyngri.
Hvað þýða úrslitin?
Fram situr í sjöunda sætinu meðan Fylkismenn eru á botninum.
Vondur dagur
Birkir Eyþórs verður að taka þetta á sig, gefur mark og hefur sennilega alltaf eða allavega oftast spilað betur en í dag.
Dómarinn - 6
Dómgæslan sjálf heilt yfir góð að mínu mati, en ég dreg hann niður fyrir að leyfa Fram að drepa leikinn of mikið og bæta svo bara við 4 mínútum, ég hefði alveg skilið þolinmæðina fyrir leik Fram í seinni hálfleik ef teymið hefði bætt verulega við leikinn upp á móti, en svo var ekki og finnst mér það lélegt.