SKÝRSLAN: Meistarabragur í Kópavogi
Hvað réði úrslitum?
Fleiri færi nýtt. Hvorugt lið sátt við færanýtingu sína í dag. Stórskemmtilegur fótboltaleikur á að horfa og hefði getað endað með mikið fleiri mörk en raungerðist.
Bestu leikmenn
1. Samantha Rose Smith (Breiðablik)
Óstöðvandi í dag eins og nánast alltaf. Hún er jafnan potturinn og pannan í sóknarleik Breiðabliks og þótt hún hafi verið á miðjunni bróðurpart þessa leiks þá er hún alveg jafn góð þar og á kantinum.
2. Heiða Ragney Viðarsdóttir (Breiðablik)
Umferðarstjórinn á miðjunni. Braut bæði niður sóknir FH og kom samherjum í góðar stöður. Róleg á boltanum og tvíefldist í seinni hálfleik þegar Karítas kom inn á miðjuna með henni.
Atvikið
Þriðja mark Breiðabliks á 33. mínútu leiksins kom eiginlega strax í kjölfarið á öðru markinu. Það breytti svolítið leiknum þar sem FH var yfir 13 mínútum áður. Eftir það þá var ekki nokkur spurning um það hvort liðið myndi sigra enda þær grænklæddu mikið mun sterkari með fleiri góð færi.
Hvað þýða úrslitin?
Blikar eru ennþá stigi á undan Val í baráttunni um sigur í Bestu deildinni. Valskonur unnu Víking Reykjavík 2-1 og Blikakonum dugir jafntefli á Hlíðarenda næstu helgi. FH eru ennþá á botni efri hlutans með 25 stig en Breiðablik fer upp í 60 stig.
Vondur dagur
Færanýting. Færanýting beggja liða átti vondan dag. Bæði lið óðu í færum í leiknum en undirritaður á eftir að bíða spenntur eftir xG tölfræðinni þegar Besta deildin birtir hana.
Dómarinn - 8
Gunnar og hans fólk með góð tök á leiknum. Kannski 1, 2 rangstöðudómar sem gætu verið rangir en þó ekki þannig að það lækki teymið of mikið niður.