Les vel í leikinn þarna! Viðtöl og fleira á leiðinni. Þangað til næst, takk fyrir mig!

Eftir góða sókn Vals fær Gísli Laxdal boltann inni á teignum en hann tekur skotið sem fer rétt framhjá.

Patrick Pedersen er núna kominn í mjög gott færi inni á teig ÍA en tekur skotið rétt framhjá. Þetta er orðið vandræðalegt fyrir Skagamenn

Steinar tekur spyrnuna sem Frederik handsamar.

Steinar tekur spyrnuna inn á teiginn sem Frederik Schram nær til.

Steinar Þorsteins kemur með fyrirgjöf inn á teiginn sem Viktor Jóns nær til og tekur skotið í loftinu sem Frederik ver í horn.

Gylfi tekur spyrnuna á fjærsvæðið en Viktor Jóns skallar boltann út í innkast.

Gylfi Þór fær boltann fyrir utan vítateig Skagamanna og tekur skotið sem fer yfir Árna í markinu og í þverslána. Jónatan nær frákastinu en Árni sér við honum.

Haukur Andri reynir skot í fyrsta fyrir utan vítateig Vals eftir skemmtilega sókn ÍA sem Frederik er í engum vandræðum með.

Valsmenn leiða með fjórum mörkum gegn einu þegar liðin ganga til búningsklefa. Gífurlega skemmtilegur fyrri hálfleikur en Skagamenn hafa verið skelfilegir og virka illa samstilltir.

Steinar Þorstiens tekur spyrnuna stutt á Johannes Vall og þeir spila á milli sín áður en Johannes tekur spyrnuna inn á teiginn. Þar er Erik Tobias mættur og tekur skotið sem fer yfir markið.

Þetta hefði verið eitt af mörkum ársins. Gylfi og Patrick spila ekkert smá vel á milli sín áður en Patrick tekur skotið sem Árni Marinó ver í horn. Þetta minnti mig á Arsenal undir Wénger.

Stjörnumenn hafa tekið forystuna gegn FH sem þýðir að Valsmenn mega bara ekki tapa til að tryggja þetta Evrópusæti. Ef Valur tapar í dag og Stjörnumenn vinna FH-inga taka Stjörnumenn 3. sætið, sem gefur Evrópu.

Gylfi tekur spyrnuna inn á teiginn sem Skagamenn verjast vel og keyra svo fram í skyndisókn.

Gylfi tekur spyrnuna inn á teiginn sem Patrick skallar rétt framhjá. Þetta var dauðafrír skalli en daninn hittir ekki á markið.

Gylfi Sig tekur spyrnuna inn á teiginn sem Johannes Vall skallar frá.

Það er mjög spes að horfa á leik en heyra ekkert. Eina sem ég heyri er eitthvað soundcheck sem er í gangi í parket húsi Vals. Þetta var alveg fínt til að byrja með en mig langar að heyra í því sem ég er að horfa á núna.

Albin Skoglund fær boltann inni á teig ÍA eftir flott samspil við Patric Pedersen. Albin keyrir inn á teiginn og fer framhjá nokkrum varnarmönnum ÍA en þegar hann kemur boltanum til hliðar á Patrick hittir hann ekki boltann og sóknin rennur í sandinn.

Johannes Vall tekur spyrnuna inn á teiginn sem Valsmenn skalla frá aður en dómarinn dæmir brot á ÍA.

Tryggvi fær boltann í gegn og rennir honum til hliðar á Patrick. Daninn ætlar framhjá Árna í markinu en nær ekki að taka boltann með sér alla leið. Valsmenn eru að byrja þennan leik stórkostlega!

Slök spyrna hjá Gylfa Sig sem endar í markspyrnu sem Skagamenn eiga.

Gylfi og Jónatan taka þríhyrning inni á teig ÍA og þegar Gyfli ætlar að fá boltann aftur lendir hann í árekstri við Oliver Stefánsson inni á teignum og fer niður. Valsmenn mótmæla og vilja vítaspyrnu en fá ekki, Oliver liggur eftir niðri en stendur svo upp.

Steinar Þorsteins tekur spyrnuna inn á teiginn en Valsmenn gera vel og hreinsa frá.

Gylfi Sig tekur spyrnuna sem Valsmenn verjast mjög vel. Aon Jóh tekur svo skotið í fyrsta af löngu færi sem Árni Marinó er í engum vandræðum með.

Gífurlega löng og hættuleg sókn Vals endar með skoti frá Birki Má Sævarssyni sem fer í varnarmann og aftur fyrir. Ég var bara að bíða eftir að boltinn myndi detta í netið en Valsmenn fá horn!

Viktor Jóns sparkar þessu í gang. Skagamenn leika í gulum treyjum, svörtum stuttbuxum og svörtum sokkum. Valsmenn leika í rauðum treyjum, hvítum stuttbuxum og rauðum sokkum.

Börkur Edvardsson lét af formennsku knattspyrnudeildar Vals á dögunum en hann er heiðraður hér fyrir leik og fær blómvönd frá Þorvaldi Örlygssyni. Birkir Már Sævarsson, vindurinn, er þá að spila sinn síðasta leik á ferlinum og er einnig heiðraður af formanni knattspyrnudeildar Vals.

Þá ganga liðin og dómararnir til vallar og gera sig klár í slaginn.

Það er soundcheck í gangi fyrir einhvern viðburð í parkethúsi Vals og því heyri ég bara ekkert hvað er í gangi úti á velli eða hreinlega bara hvað ég er að segja. Góð tónlist samt og ljúfir tónar.

Srdjan Tufegdzic, þjálfari Vals, gerir fjórar breytingar á Valsliðinu frá 1-1 jafnteflinu gegn FH í Kaplakrika í síðustu umferð. Frederik Schram, Birkir Már Sævarsson, Sigurður Egill Lárusson og Tryggvi Hrafn Haraldsson koma inn í liðið fyrir þá Ögmund Kristinsson, Bjarna Mark Antonsson, Gísla Laxdal Unnarsson og Kristinn Frey Sigurðsson. Skagamenn gera eina breytingu á sínu liði eftir tapið þeirra gegn Víkingum í seinasta leik. Fyrirliðinn Arnór Smárason, sem leggur skóna á hilluna eftir leik, kemur úr liðinu og tekur sér sæti á bekknum. Guðfinnur Þór Leósson kemur inn í hans stað.

Kristinn Freyr Sigurðsson verður ekki með Val þar sem hann hefur safnað tíu spjöldum. Bjarni Mark Antonsson verður einnig í banni hjá Hlíðarendaliðinu. Þá verður Jón Þór Hauksson, þjálfari ÍA, ekki á hliðarlínunni þar sem hann fékk rautt eftir síðasta leik ÍA gegn Víkingum þar sem mikið gekk á undir lokin.

Þúsundþjalasmiðurinn Gunnlaugur Jónsson spáir í leikina sem eru framundan í lokaumferð Bestu deildarinnar en hann hefur séð um það að taka viðtöl fyrir Stöð 2 Sport á leikjum í Bestu deildinni í sumar.Valur 2 - 2 ÍA (16:15 í dag) Mínir menn á Skaganum eru ennþá brjálaðir eftir síðustu helgi en þeim tekst að nota þá orku í lokaleikinn á Hlíðarenda. Þetta verður hörkuleikur sem verður opinn og skemmtilegur og Viktor Jónsson nær að skora og komast í 19 marka klúbbinn. Þetta verður síðasti leikur Gylfa fyrir Val sem mun eiga stórleik og skora bæði mörk liðins en vonandi verður þetta ekki lokaleikur hans á ferlinum.

Valsliðinu var spáð efsta sæti fyrir komandi tímabil í efstu deild þar sem öllu var tjaldað til. Þeim nægir jaftefli í dag í lokaumferðinni fyrir Evrópusæti. Ef Valsmenn ná ekki Evrópusæti eftir öll þessi kaup og þessar væntingar þarf liðið að fara í naflaskoðun.

Lögregluvarðstjórinn sjálfur Pétur Guðmundsson stýrir flautukonsertinu í dag á Hlíðarenda en honum til halds og trausts verða þeir Bryngeir Valdimarsson og Bergur Daði Ágústsson. Skiltadómari er Gunnar Freyr Róbertsson og eftirlitsmaður KSÍ er Jón Magnús Guðjónsson.

Arnór Smárason, leikmaður ÍA, og Birkir Már Sævarsson, leikmaður Vals, eru að spila sinn seinasta leik í dag á sínum glæsilegu ferlum. Þeir voru meðal annars liðsfélagar hjá Hammarby í Svíðþjóð og hjá Val líka. Hér að neðan má sjá mynd af þeim Arnóri, Birki og Ögmundi Kristjánssyni en Ögmundur er leikmaður Vals í dag. Margir sparkspekingar hafa verið að velta steinum upp á síðkastið hvort hreinlega leikurinn í dag sé síðasti leikur Gylfa Sig á ferlinum eftir viðbrögð hans í viðtali eftir FH leikinn. Gylfi spilaði mjög lítið í seinasta landsliðsverkefni. Sæti Túfa, þjálfara Vals, er orðið býsna óöruggt ef Valur nær ekki Evrópusæti. Túfa var ráðinn á miðju tímabili sem þjálfari Vals eftir að Arnar Grétarsson var látinn fara en hann lét þau orð falla eftir undirskriftina að hann stefndi á Íslandsmeistaratitilinn með Valsmönnum í ár.

Lokaumferð Bestu deildarinnar er spiluð í dag fyrir utan auðvitað úrslitaleik Víkings og Breiðabliks sem fer fram á morgun. Valsmenn geta misst Evrópusætið með tapi í dag og ef Stjarnan vinnur FH. Annars eru Skagamenn úr leik í Evrópubaráttunni eftir tap gegn Víkingum í seinustu umferð.