SKÝRSLAN: Markametið og HK féllu
Hvað réði úrslitum?
Þegar jafnt var í liðum fannst mér KR-ingar sýna mikla yfirburði en þeir jukust til muna þegar Þorsteinn Aron var rekinn af velli um miðjan fyrri hálfleik. HK-ingar sáu að erfitt væri að koma til baka úr 2-0 stöðu manni færri og við það fór trúin. KR-ingar stigu aldrei af bensíngjöfinni og röðuðu inn mörkunum. Benóný Breki ótrúlegur og sýndi hversu góður hann er í dag.
Bestu leikmenn
1. Benoný Breki Andrésson
Benóný með fimm mörk í dag, magnaður. Staðsetningar, slúttin og dugnaðurinn, hann hefur þetta allt.
2. Aron Sigurðarson og Jóhannes Kristinn Bjarnason
Þarf að velja tvo hérna í dag.
Aron átti eina af bestu stoðsendingum ársins í fjórða markinu. Átti þrjár stoðsendingar í dag og var frábær.
Jóhannes var geggjaður í dag. Fyrsta markið sturlað og síðan átti hann góða stoðsendingu á Benóný.
Atvikið
Það var þegar Ívar Orri bendir á punktinn og rekur Þorstein Aron af velli, HK menn sáu ekki til sólar eftir þá ákvörðun.
Auðvitað risastórt þegar Benóný skoraði sitt fjórða mark og sló markametið.
Hvað þýða úrslitin?
HK eru fallnir.
KR-ingar enda í 8. sæti deildarinnar.
Vondur dagur
Úff það eru nokkrir í HK-liðinu sem áttu ekki sinn besta dag. Þorsteinn Aron auðvitað ranglega rekinn af velli en hann býður hættunni heim þegar hann rennir sér í sínum eigin teig. Leifur Andri átti ekki sinn besta dag í hjarta varnarinnar. Miðja HK var arfaslök og er þetta einn versti leikur sem ég hef séð Arnþór Ara spila. Þessir þrír ásamt öllum úr HK-liðinu áttu vondan dag.
Dómarinn - 1
Ívar Orri Kristjánsson dæmir víti og rekur Þorstein Aron af velli, en það var engin snerting í tæklingu Þorsteins. Gef Ívari það að Benóný lék þetta vel. Þessi mistök gerði út um allar vonir HK-inga.