Kári Snorrason @karisnorra

Textalýsing Skýrslan Viðtöl

Hvað réði úrslitum? Víkingar byrjuðu leikinn af miklum krafti og skoruðu tvívegis með skömmu millibili. Borac liðið leit virkilega illa út, íslensku aðstæðurnar voru þeim ekki að skapi. Þeir vöknuðu þó aðeins það sem leið á leikinn en ógnuðu lítið marki Víkinga. Ingvar varði eitt sinn meistaralega en færi Borac manna voru af skornum skammti. Víkingar hefðu getað aukið forystu sína en færin fóru forgörðum. Yfir heildina litið frábær frammistaða Víkinga og sanngjarn sigur. Víkingar voru þéttir baka til og nýttu sér lágvaxið hafsentapar gestanna til hins ýtrasta. Bestu leikmenn 1. Karl Friðleifur Gunnarsson Karl frábær í vinstri bakverðinum í dag. Víkingar sóttu mikið upp vinstri vænginn. Mark og stoðsending úr vinstri bakverði er ágætis dagsverk. 2. Viktor Örlygur Andrason Hægt að velja marga en Viktor var frábær djúpur á miðjunni, þvílík vinnusemi frá fyrstu mínútu til hinnar síðustu. Leikmenn sem vert er að minnast á eru Gísli Gotti, Danijel Djuric, Ingvar Jónsson og Nikolaj Hansen. Atvikið Markið hjá Karli Friðleifi sem kemur Víkingum í 2-0, gríðarlega mikilvægt að nýta meðbyrinn sem Víkingar höfðu í byrjun leiks og skora skömmu eftir fyrsta markið.

Hvað þýða úrslitin? Víkingar eru komnir með sex stig í Sambandsdeildinni eftir aðeins þrjá leiki. Víkingar í kjörstöðu að ná að komast í umspil, 24 efstu liðin komast í umspil. Vondur dagur Allir Víkingar frábærir í dag, hann Jurich Carolina heillaði okkur ekki í blaðamannastúkunni. Einnig á Boban Nikolov frábæra stoðsendingu á Karl Friðleif. Danijel Djuric reynir þó eflaust að stela stoðsendingunni af Boban. Dómarinn - 4 Ég er ekki mikill Jan Petrik maður eftir daginn í dag. Mér fannst Víkingar eiga að fá vítaspyrnu er Danijel Djuric var rifinn niður í teignum. Svo var gomma af skrýtnum minniháttar ákvörðunum teknar af Tékkanum, fall á Petrik!