Elvar Geir Magnússon @elvargeir

Textalýsing Skýrslan

Hvað réði úrslitum? Víkingar byrjuðu leikinn betur og náðu verðskuldað forystunni þegar þeir fengu Vítaspyrnu. Ari Sigurpálsson skoraði af öryggi af punktinum. Heimamenn svöruðu vel en eftir það var leikurinn í fullkomnu jafnvægi og fátt um opin marktækifæri í seinni hálfleiknum. Jafntefli niðurstaðan og Víkingur endaði í 19. sæti Sambandsdeildarinnar með átta stig. Bestu leikmenn 1. Oliver Ekroth - Víkingur Sænski kletturinn var hrikalega öflugur. Fékk gult spjald snemma en með reynslu sinni og klókindum truflaði hann það ekkert frekar. Setti tóninn í baráttu og vilja. 2. Gísli Gottskálk Þórðarson - Víkingur Enn ein þroskaða frammistaða hans á miðsvæðinu. Mögulega hans síðasti leikur fyrir Víking... hann gæti verið seldur í atvinnumennskuna í janúarglugganum. Atvikið Þegar varnarmaður LASK fékk boltann í hendina í kjölfarið á löngu innkasti Davíðs Arnar Atlasonar. Dómarinn benti á punktinn.

Hvað þýða úrslitin? Víkingur heldur áfram að skrifa söguna með Evrópuárangri sínum og langmesta leikjafjölda á einu tímabili í Íslandssögunni. Peningarnir hrannast inn á bankabókina og umspil bíður Víkings í febrúar. Þar verður mótherjinn Olimpija Ljúbljana frá Slóveníu eða Panathinaikos frá Grikklandi og sigurvegarinn fer í 16-liða úrslitin. Rosalegur árangur hjá Víkingum. Vondur dagur Það var leiðinlegt að sjá Jón Guðna Fjóluson fara af velli á börum í lok fyrri hálfleiksins. Skyndilega fékk hann sér sæti á grasinu og hélt um nárann. Vonandi verður hann kominn til baka fyrir umspilið. Dómarinn - 9,5 Gríðarlega vel dæmdur leikur. Þegar ég efaðist eitthvað um ákvarðanir finnska dómarans þá sýndu endursýningar að hann hafði alltaf hárrétt fyrir sér. Með góð tök á leiknum.