SKÝRSLAN: Fyrirliðinn magnaði tók málin í sínar hendur
Hvað réði úrslitum?
Stjarnan byrjaði betur í báðum hálfleikum en heilt yfir voru Blikarnir sterkari og áttu stigin þrjú skilið. Þetta virtist vera að fjara út en þá steig Höskuldur Gunnlaugsson, þessi magnaði fyrirliði, upp og tók málin í sínar hendur. Markið var stórkostlegt og gæti verið stór fyrir Blikana fyrir framhaldið.
Bestu leikmenn
1. Óli Valur Ómarsson (Breiðablik)
Þá hann hafi ekki skorað eða lagt upp, þá var Óli Valur stórkostlegur í kvöld. Hans gömlu liðsfélagar í Stjörnunni réðu ekkert við hann og skapaði Óli mikla hættu.
2. Ásgeir Helgi Orrason (Breiðablik)
Kom inn í vörnina og spilaði eins og kóngur í baráttunni við Andra Rúnar og Emil Atla.
Atvikið
Það er auðvitað bara sigurmarkið sem Höskuldur skorar á lokaandartökum leiksins. Litla atvikið sem það var!
Hvað þýða úrslitin?
Breiðablik kemst aftur á sigurbraut eftir slæmt tap gegn Fram í síðustu umferð. Ég held að þessi sigur sé mikilvægari en menn kannski gera sér grein fyrir núna. Þetta var stór sigur fyrir Blika þó stutt séð liðið á sumarið. Stjarnan var með fullt hús fyrir þennan leik en þetta var þeirra fyrsta tap.
Vondur dagur
Óli Valur var frábær hjá Blikunum en mér fannst Benedikt Warén ekki finna sama taktinn gegn sínum gömlu félögum í Breiðabliki. Hann náði sennilega minnstum takti af sóknarmönnum Stjörnunnar. Alex Þór leit því miður ekki vel út í markinu sem Höskuldur skorar, mjög auðvelt fyrir fyrirliða Blika að snúa hann af sér.
Dómarinn - 7
Mér fannst heilt yfir Elías hafa góð tök á leiknum og dæma vel. Stjörnumenn voru ósáttir við augnablik undir lokin þar sem klárlega var brotið á Emil Atla og ekkert dæmt á það, en það réði ekki úrslitum. Það átti fullt eftir að gerast.