SKÝRSLAN: Gjörsamlega sturlaður fótboltaleikur
Hvað réði úrslitum?
Ég veit ekki í raun hvað skal segja. Þetta var fram og til baka eins og körfuboltaleikur. Einhver besti fótboltaleikur sem ég hef séð, ég held ég geti alveg sagt það. Þó staðan hafi verið 0-0 í hálfleik þá skemmti maður sér konunglega. KR-ingar tóku augnablikið gjörsamlega eftir að hafa lent 2-0 undir og voru við það að taka sigurinn, en Blikar náðu að pota inn jöfnunarmarkinu í lokin. KR-ingar er búnir að brenna skipin og núna verður ekki aftur snúið.
Bestu leikmenn
1. Eiður Gauti Sæbjörnsson (KR)
Mér fannst varnarmenn Breiðabliks vera í bölvuðu brasi með Eið Gauta allan leikinn og sérstaklega í seinni hálfleik. Hann skoraði fyrsta mark KR og átti risastóran þátt í endurkomunni.
2. Júlíus Mar Júlíusson (KR)
Þó KR hafi fengið á sig þrjú mörk, þá fannst mér Júlli frábær í leiknum og átti margar góðar tæklingar. Var með fyrirliðabandið og það var ekkert of stórt fyrir hann. Hrikalega spennandi leikmaður. Tobias Thomsen og Anton Logi voru bestu leikmenn Blika í dag.
Atvikið
Það er fyrsta markið sem KR gerir að mínu mati. Leikurinn hafði verið sturlaður fyrir það og hann var enn sturlaðari eftir það mark. Þetta var bara algjör veisla sem við fengum á Kópavogsvelli í dag.
Hvað þýða úrslitin?
KR er enn taplaust en hefur gert fjögur jafntefli í fyrstu fimm leikjunum. Blikar eru í þriðja sæti með jafnmörg stig og Vestri og Víkingur.
Vondur dagur
Óli Valur Ómarsson fannst mér geta gert betur. Hann hefur hraða á við fáa leikmenn í deildinni og það hefði átt að koma meira úr honum í þessum leik. Fann sig ekki alveg. Varnarmenn Blika skulfu á beinunum í stöðunni 2-1 og voru bara hræddir. Þeir voru litlir og litu ekki út eins og Íslandsmeistararnir sem þeir eru.
Dómarinn - 7
Mér fannst Jóhann Ingi dæma leikinn bara nokkuð vel. Lét hann fljóta mikið og sleppti nokkrum brotum hér og þar. Það var ekkert rosalega mikið um stór atvik í leiknum en hann kom sér vel frá þessu ásamt sínu teymi.