SKÝRSLAN: Þægilegur sigur FH í Árbænum
Hvað réði úrslitum?
Eitt liðið spilar í Bestu deild en hitt liðið í Lengjudeildinni og munurinn sást vel á Tekk vellinum hér kvöld. Um leið og FH tókst að skora sitt fyrsta mark opnaðist leikurinn alveg á gátt og FH konur skoruðu fjögur mörk á rúmum tuttugu mínútum.
Bestu leikmenn
1. Ída Marín Hermansdóttir
Var eins og drottning í sínu ríki og stjórnaði miðjunni bæði í vörn og sókn. Minnti smá á Patrick Vieira fyrir þá sem muna eftir honum. Notaði lengd sína vel í leiknum og vann alla 50-50 bolta. Lagði upp eitt mark á silurfati og skoraði tvö sjálf.
2. Maya Lauren Hansen
Hefði getað skorað fimm mörk í þessum leik. Brenndi af þrjú dauðfæri í fyrri hálfleik en kom öskureið og ákveðin til seinni hálfleiks og setti tvö á fyrst tíu mínútum seinni hálfleiks. Ógnaði vörn Fylkiskvenna stöðugt í leiknum.
Atvikið
Þegar Maya skoraði fyrsta markið á 52 mínútu eftir góðan sprett og fyrirgjöf frá Hildi og negldi boltanum fast í netið og leysti orkunni úr læðingi. Hún fékk nefnilega tvö mjög svipuð færi í fyrri hálfleik en klikkaði. Eftir þetta fór öll pressan af FH og munurinn á liðinum kom æ betur í ljós.
Hvað þýða úrslitin?
FH er komið áfram í 8 liða úrslit í mjólkurbikar kvenna og Fylkiskonur geta nú einbeitt sér alfarið að Lengjudeildinni og reynt að komast aftur upp í þá Bestu.
FH getur ennþá unnið tvöfalt í ár.
Vondur dagur
Það átti engin vondan leik í dag, getumunurinn var einfaldlega talsverður. Vondan dag ætla ég að gefa ferlinu á skiptingunum í þessum leik. Af einhverjum ástæðum var engin tafla fyrir skiptingar og rosalega erfitt fyrir undirritaðan að átta sig á því hver var að koma inn og hver var að fara út af, sérstaklega þegar það var tvöföld skipting hjá FH og þreföld hjá Fylki á sama tíma. Sá sem átti að passa upp á að skiptitaflan virki átti vondan dag hver svo sem það kann að vera.
Dómarinn - 9
Vel dæmdur leikur hjá Hallgrími hér í kvöld. Dæmdi brot þegar það átti við sem og gul spjöld. Ekkert umdeilt atvik í leiknum og fór lítið fyrir honum. En sennilega ekki erfiðasti leikurinn til að dæma vegna yfirburða FH liðsins.