Þá er þessum leik lokið. Þessi leikur verður seint talinn mikil skemmtun.

Takk fyrir samfylgdina. Viðtöl og skýrsla væntanleg.

+6 Arnór Gauti með annað langt innkast sem Aron Elí skallar beint á Rosenörn.

+5 Skallatennis inni á teignum eftir langt innkast frá Arnóri Gauta en gestirnir ná ekki að skapa sér færi.

Uppbótartíminn er átta mínútur.

Aukaspyrnan er fín í nærhornið en Jökull sér við honum.

Kjartan Kári er að stilla sér upp fyrir aukaspyrnu.

Gunnar Oddur Hafliðason kemur núna inn á fyrir AD2 Bryngeir Valdimarsson, sem þarf að víkja vegna meiðsla.

Elmar Cogic dansar með boltann inn á teignum en lætur sig svo detta í baráttu við Jóhann Ægi og vill fá víti! Vilhjálmur Alvar gefur ekkert fyrir það og ekki heldur Jóhann Ægir, sem lætur Elmar heyra það.

Aron Jó með hornspyrnu beint af æfingasvæðinu og boltinn endar hjá Elmari Cogic sem nær skoti á markið en Rosenörn ver frá honum.

Bjartur Bjarmi skýtur rétt fyrir utan teig og boltinn fer í horn.

Kjartan Kári ákveður að þruma boltanum á markið af löngu færi og Jökull þarf alveg að hafa fyrir þessari vörslu!

Nú leggst Gunnar Bergmann aftur og hann hlýtur einfaldlega að þurfa skiptingu. Sigurpáll Melberg liggur einnig eftir.

Leikurinn er stoppaður, vegna þess að Gunnar Bergmann liggur eftir og fær aðhlynningu.

Sigurður Bjartur á góðan sprett upp kantinn og gefur fyrir en aldrei svo vant, skallar Axel Óskar frá.

Arngrímur þræðir boltann inn á teiginn, þar sem Tómas Orri stendur. Tómas nær hins vegar sáralitlum krafti í skotið.

Jökull Andrésson liggur og fær aðhlynningu.

Sá fagurblái er mættur ????
Í ár stöndum við saman með Gleym mér ei styrktarfélag!

Lestur: Ebba Katrín Finnsdóttir
Lag: Friðrik Dór pic.twitter.com/wdI4RXdtPv

— FHingar (@fhingar) June 1, 2025

Vilhjálmur Alvar flautar til hálfleiks. Það verður að segjast, að þessi fyrri hálfleikur er einhver leiðinlegasti fyrri hálfleikur tímabilsins.

Arngrímur á sendingu inn á teiginn á Úlf, sem reynir að koma boltanum á markið en hann fer í Axel Óskar og FH-ingar vilja fá dæmda hendi á hann!

Benjamin Stokke sækir aukaspyrnu á fínum stað. Aron tekur spyrnuna en hún fer beint á Rosenörn.

Það er voða lítið til þess að fjalla um í þessum leik. Það er nákvæmlega ekki neitt að gerast á Kaplakrikavelli.

Tómas Orri lætur vaða á markið rétt fyrir utan teig en boltann fer beint á Jökul.

Þessi leikur hefur verið rosalega tíðindalítill hingað til.

Sigurður Bjartur sækir aukaspyrnu rétt fyrir utan teig. Kjartan Kári mun setja þennan bolta fyrir.

Úlfur rennir boltanum til hægri á Dag sem reynir að koma boltanum á markið en Aron Elí nær að komast fyrir boltann. Dagur Fjeldsted er oft á tíðum með óþarflega mikið pláss út á hægri væng.

Það er áhugavert að skoða leikskipulag FH-inga. Þeir eru í 4-2-3-1 og Úlfur Ágúst er fyrir aftan Sigurð Bjart í þeirri uppstillingu og fær mikið frjálsræði í því hlutverki.

FH-ingar sækja hart að marki Aftureldingar og nú er það Baldur Kári sem á skot en það fer framhjá.

Úlfur Ágúst þeytist upp kantinn og teiknar frábæran bolta inn á teiginn en Sigurður Bjartur missir af honum.

Kjartan Kári á fína fyrirgjöf sem vörn Aftureldingar nær að bægja frá en boltinn dettur fyrir Úlf, sem á svo gott skot en Jökull ver.

Elmar Kári á skot vel fyrir utan teig sem fer rétt framhjá markinu.

Úlfur Ágúst vinnur boltann vel á miðsvæðinu. Sendir hann út í breiddina á Dag Fjeldsted sem er með allt pláss í heiminum en Vilhjálmur Alvar dæmir svo peysutog á Úlf, þegar Dagur er að sleppa í gegn.

Vilhjálmur Alvar flautar leikinn í gang! Gestirnir hefja leik.

FHingar hafa verið ansi öflugir í síðustu tveimur heimaleikjum og unnið sannfærandi sigra á bæði Val og Breiðablik. Grunar að leikstíll Aftureldingar henti FHingum ágætlega á grasinu í Kaplakrika og því eflaust margir sem horfa í FH sigur á stuðlinum 1.72.

Heimir Guðjónsson, þjálfari FH, gerir þrjár breytingar á sínu liði frá leiknum í Eyjum. Birkir Valur Jónsson, Björn Daníel Sverrisson og Grétar Snær Gunnarsson setjast á bekkinn. Inn í liðið koma Arngrímur Bjartur Guðmundsson, Dagur Örn Fjeldsted og Jóhann Ægir Arnarsson.

Magnús Már Einarsson, þjálfari Aftureldingar, gerir einungis eina breytingu á sínu liði. Aron Jóhannsson kemur aftur inn í liðið fyrir Sævar Atla Hugason.

Hinn árlegi góðgerðarleikur FH-inga mun fara fram í kvöld. Góðgerðartreyjan verður frumsýnd og verður spennandi að sjá hana.

Það eru margir leikir á dagskrá í Bestu deild karla í dag. Sannkölluð veisla.

14:00 KR-Vestri (AVIS völlurinn)
17:00 KA-Stjarnan (Greifavöllurinn)
18:00 ÍA-ÍBV (ELKEM völlurinn)
18:00 FH-Afturelding (Kaplakrikavöllur)
19:15 Breiðablik-Víkingur R. (Kópavogsvöllur)

Nýliðarnir úr Mosfellsbæ sitja í 11. sæti Bestu deildarinnar með jafnmörg stig og FH. Þeir geta einnig slitið sig frá botninum með sigri í dag. Hins vegar hafa þeir tapað seinustu tveimur leikjum gegn KA og Val.

FH situr í 10. sæti Bestu deildar karla með 10 stig og hafa fagnað góðu gengi á heimavelli í byrjun móts en þeir hafa ekki enn tapað í Kaplakrika. Þeir töpuðu fyrir ÍBV í Vestmannnaeyjum í síðustu umferð en þeir geta rifið sig upp í efra hluta deildarinnar með sigri í dag.

Verið hjartanlega velkomin í þráðbeina textalýsingu frá viðureign FH gegn Aftureldingu á Kaplakrikavelli í kvöld!