SKÝRSLAN: Mosóbrósar ekki mikið fyrir það að tapa í Mosó
Hvað réði úrslitum?
Án þess að vera að spila frábærlega voru Blikar þó betri í fyrri hálfleiknum. Óli Valur skorar frábært mark og hitt skora þeir eftir fast leikatriði. Þeir virtust ná að loka á kantana hjá Aftureldingu framan af leik en það er ekkert leyndarmál að Afturelding vill koma sínum kantmönnum í 1v1 stöður. Eitthvað breyttist þó í hálfleiknum, kantarnir opnuðust fyrir Hrannar og Elmar og Afturelding tóku öll völd á vellinum þangað til alveg í lokin. Úr því sem komið var voru Afturelding líklega sáttir með stigið en ég er ekki frá því að þeir hafi átt öll þrjú skilið.
Bestu leikmenn
1. Hrannar Snær Magnússon (Afturelding)
Blikarnir réðu ekkert við hann þegar Aftureldingu tókst lokksins að koma honum í 1 á 1 stöður á bakvörðinn sinn. Skoraði fyrra markið, lagði upp það seinna og Blikar þurftu að taka á sig tvö gul spjöld til að stoppa hann. Það er annað hvort að brjóta á honum eða sitja eftir í rykinu, enda Micky van de Ven hraði á honum.
2. Axel Óskar Andrésson (Afturelding)
Þvílíkur leiðtogi sem Axel Óskar er í þessu Aftureldingarliði. Hann er á alvöru hefndartúr þetta tímabilið og er að spila gríðarlega vel. Leiðir með fordæmi og hendir sér fyrir allt auk þess að rífa stúkuna og liðið með sér áfram. Átti nokkrar góðar tæklingar og lítið við hann að sakast í mörkunum sem þeir fengu á sig. Einnig ber að nefna Anton Ara sem sá til þess að Blikar fóru ekki tómhentir heim úr Mosfellsbænum í dag.
Atvikið
Fyrsta mark Aftureldingar kom á gríðarlega mikilvægum tíma. Rétt fyrir hálfleikinn og gaf þeim byr undir báða vængi fyrir þann seinni. Sneri augnablikinu þeim í vil og þeir tóku það með sér inn í seinni hálfleikinn
Hvað þýða úrslitin?
Eitt stig á bæði lið sem breytir stöðu þeirra í deildinni akkúrat ekki neitt í bili. Blikarnir gætu hins vegar misst Víkingana fimm stigum frá sér, vinni þeir sinn leik í eyjum um helgina, og misst Val fram úr sér á markatölu, vinni þeir sinn leik á Ísafirði. Afturelding sitja enn í 7. sæti deildarinnar og fara upp í 18 stig, einu stigi á eftir Vestra og Fram og tveimur stigum á eftir Stjörnunni. Þeir gætu misst KR fram fyrir sig, vinni þeir sinn leik gegn KA.
Vondur dagur
Í leik þar sem enginn var áberandi versti maður vallarins set ég þetta á Andra Yeoman. Fór meiddur út af eftir tæplega fimmtán mínútna leik en Dóri sagði í viðtali eftir leik að þetta liti ekkert allt of vel út. Vonandi fyrir Andra og Blika að það fari betur en svo að hann sé frá í einhvern tíma en álagið er að aukast á liðið í ljósi þess að Evrópuleikirnir fara að rúlla af stað.
Dómarinn - 9
Mér fannst ÞÞÞ bara vera með þetta í teskeið satt best að segja. Reif upp kortin þegar það átti við og var ekkert að flauta að óþörfu sem gerði flæðið gott. Engin vafaatriði til að grípa í sem segir allt sem segja þarf um hans frammistöðu, stórgott!