SKÝRSLAN: Fyrsti deildarsigur Víkinga síðan í júní og Ingvar fékk að spila!
Hvað réði úrslitum?
Víkingar voru betri, með fín tök á leiknum heilt yfir og fengu fleiri færi, Skagamenn fengu vissulega frábært færi í fyrri hálfleik til að komast yfir en svo geta þeir þakkað Árna Marinó fyrir að tapa ekki stærra.
Bestu leikmenn
1. Árni Marinó Einarsson - ÍA
Árni var virkilega öflugur í markinu og tók tvær ef ekki þrjár frábærar vörslur til þess að halda Skagamönnum inní leiknum allan tímann.
2. Óskar Borgþórsson - Víkingur R.
Óskar skoraði markið sem skar á milli í dag, átti annað frábært skot sem stefndi í samskeytin sem Árni varði glæsilega og var sífellt ógnandi í dag.
Atvikið
Björgun Helga Guðjónssonar á línu þegar Gabríel Snær var búinn að sóla Ingvar, það var stórkostlega vel gert hjá Helga þar sem slúttið hjá Gabríel var alls ekki lélegt, þar hefðu Skagamenn komist yfir í fyrri hálfleik.
Hvað þýða úrslitin?
Víkingar komast nær Val í toppbaráttunni en Skagamenn sitja sem fastast á botni deildarinnar.
Vondur dagur
Glatað að geta ekki sett fingurinn á neinn hérna en þetta var stál í stál leikur þar sem enginn var lélegur, Baldvin var ekki lélegur þrátt fyrir að hafa fengið aulalegt rautt spjald, Gabríel var ekki lélegur þrátt fyrir að hafa klúðrað dauðafæri, eftir þessi skrif dettur mér helst til Ómar Björn ef ég á að nefna þann sem kannski átti slökustu frammistöðu dagsins, hann var samt ekkert eitthvað lélegur, ósanngjarn dálkur í dag, remove Mate Dalmay?
Dómarinn - 6
Fín dómgæsla, Lárus Orri nefnir atvik á 8 mínútu sem við "sérfræðingarnir" eigum að skoða betur (cc: Valur Gunnars, Tómas Þór, Albert Ingason, Gunni Bomba). Skemmtilegasta atvik dómgæslunnar í dag var augnsamband mitt og Gunnars Odds á 45. mínútu sem var skiltalaus í fyrri og gaf mér 4 fingur til marks um uppbótartíma fyrri hálfleiks, það er hápunkturinn.