SKÝRSLAN: Þórsarar tryggðu sér sæti í Bestu deild karla í sannkölluðum úrslitaleik
Hvað réði úrslitum?
Færanýting Þórs og klókindi. Þeir nýttu alla sénsa vel en þeir voru ekkert endilega betri í leiknum. Þeir voru klókir að sækja brot og hornspyrnur og kom sigurmarkið upp úr hornspyrnu. Þeir spiluðu alveg á línunni og voru líkamlega mjög öflugir.
Bestu leikmenn
1. Sigfús Fannar Gunnarsson
Brýtur ísinn með fyrsta markinu. Alltaf iðinn við kolann og næstmarkahæsti leikmaður Lengjudeildarinnar í ár. Virkilega góður leikmaður.
2. Yann Emmanuel Affi
Hann spilaði alveg á línunni og hafði gætur á Liam Daða sem er erfitt verkefni. Flottur í hjartanu í dag.
Atvikið
Þegar Ingimar Arnar Kristjánsson gerir útslagið á 71. mínútu leiksins. Þarna varð ljóst að Þór myndi fara upp um deild. Þetta var iðnaðarmark en snyrtilega afgreitt hjá varamanninum.
Hvað þýða úrslitin?
Þetta er ósköp einfalt. Þór eru komnir upp í Bestu deild karla en þeir hafa ekki verið þar síðan árið 2014. Hins vegar fara Þróttarar í umspil um sæti í efstu deild og mæta þar HK.
Vondur dagur
Auðvitað bara leiðinlegt fyrir Þrótt að fá ekki meira út úr þessum leik en þeir voru virkilega góðir í dag. Þetta var bara stöngin út og lítið annað sem þeir geta gert, annað en að setja hausinn upp og halda áfram. Þeir geta vel farið upp um deild í gegnum umspilið.
Dómarinn - 7
Hann var fínn. Hefði mögulega geta dæmt víti á Yann Emmanuel Affi en að öðru leyti hafði hann góða stjórn á leik sem erfitt var að dæma.