SKÝRSLAN: Tíu marka leikur á Akureyri
Hvað réði úrslitum?
Fyrri hálfleikur sem var eign Víkinga nánast allan tímann skóp þennan sigur, enda 0 - 4 í hálfleik. Heimastúlkur komu sterkari inn í seinni hálfleik á meðan gestirnir slökuðu á. Þór/KA gerði sitt besta til að gera þetta að leik en staðan í hálfleik var of svört.
Bestu leikmenn
1. Jasmin Erla Ingadóttir
Jasmín átti góðan leik, stjórnaði sóknarleik Víkinga og skoraði gott mark. Hún vann líka vel til baka og hljóp t.a.m. sóknarmann Þórs/KA uppi sem var að sleppa í gegn. Dugnaðarforkur á miðjunni sem auk þess stjórnaði pressu og sóknarlotum gestanna.
2. Freyja Stefánsdóttir
Freyja var síógnandi, alltaf til í að taka hlaupin og halda varnarmönnum andstæðinganna við efnið. Hefði hugsanlega verið maður leiksins ef hún hefði klárað 90 mínútur.
Atvikið
Mark eftir 20 sekúndur og aftur strax eftir að Þór/KA minnkar muninn í 1 - 4 þá kemur fimmta mark Víkinga nánast á sömu mínútu.
Hvað þýða úrslitin?
Víkingarnir rífa sig aðeins frá botnliðunum og koma sér í efri hlutann þar sem þær eiga heima miðað við fyrri hálfleikinn.
Þór/KA situr enn neðst með 2 stig en geta hæglega sótt fleiri ef þær byrja leikina eins og seinni hálfleikinn í dag
Vondur dagur
Fyrri hálfleikur hjá Þór/KA var vondur. Það er eiginlega ekki hægt að henda einhverri einni fyrir rútuna. Eftir að hafa fengið mark á sig eftir um 20 sekúndur þá slökknaði á liðinu og þær náðu sér ekki almennilega á strik fyrr en í seinni hálfleik.
Dómarinn - 8
Leikurinn var vel dæmdur. Eina vafaatriðið var þegar Víkingar skora sjötta markið hvort boltinn hafi farið inn en það verður að treysta á að aðstoðardómarinn hafi verið vel staðsettur því hann flaggaði strax.