SKÝRSLAN: Stjarnan fékk ekki að skína til enda á Hlíðarenda
Hvað réði úrslitum?
Það sem réði úrslitum hér í dag er hreinlega léleg færanýting hjá Stjörnunni í fyrri hálfleik og grimmdin í Valskonum í seinni hálfleik. Stjörnuliðið nýttu færin sín illa og eins marks forysta er ekki neitt í fótbolta! Valskonur kunna að gíra sig inn í hálfleik og annan leikinn í röð stela þær stigi af toppliði.
Bestu leikmenn
1. Margrét Brynja Kristinsdóttir
Skoraði frábært mark og tryggði Vali stig úr leiknum. Hún er alltaf hættuleg þegar hún kemst í boltann og stendur sína plikt fyrir Valsliðið. Gæti líka nefnt Ísabellu Söru, það er lítið sem gerist sóknarlega án þess að hún eigi hlut í því en markið hér réði úrslitum.
2. Þóra María Hjaltadóttir
Skoraði sitt fyrsta mark í sumar og það var ekki af verri endandum. Var síðan solid í varnarlínunni hjá Stjörnunni og stoppaði nokkrar skyndisóknir Vals í seinni hálfleik.
Atvikið
Set þetta á jöfnunarmark Vals sem Margre´t Brynja skoraði á 67. mínútu. Stjörnunni hefndist fyrir það að hafa ekki skorað fleiri mörk í fyrri hálfleiknum.
Hvað þýða úrslitin?
Úrslitin þýða það einfaldlega að hvort lið um sig fær eitt stig. Stjarnan er áfram í 3. sætinu og er nú þremur stigum á eftir Blikunum í 2. sæti. Valur hins vegar komið í 10 stig og fer upp fyrir Víking í 7. sætið, tveimur og þremur stigum á eftir Grindavík/Njarðvík og Þrótti í 6. og 5. sætinu.
Vondur dagur
Engin sem átti áberandi vondan dag í dag en sóknarmenn Stjörnunnar voru í krummafót þegar kom að því að klára í markið! Sama má segja um hana Nadíu sem í tvígang á mjög stuttum tíma kom sér í tvö dauðafæri og hefði getað stolið sigrinum fyrir Val.
Dómarinn - 6
Ágætis frammistaða hjá dómurunum í dag, þetta var tiltölulega harður leikur, það var mikið verið að brjóta og miklar stöðubaráttur á vellinum. Ekki kannski fullkominn leikur en ekkert augljóst úrslitaatriði sem eyðilagði hann.