SKÝRSLAN: 2-1 helgi á VÍS
Hvað réði úrslitum?
Þór/KA mætti með mikla ákefð inn í leikinn og pressaði vel á gestina til að byrja með. Það skilaði marki og aftur skoraði Þór/KA svo snemma í seinni hálfleiknum. ÍBV getur alveg spilað fínasta fótbolta en það vantaði upp á ákvarðanatökur við vítateiginn og of fáar tilraunir reyndu á markvörð Þór/KA í dag. Það er allt annað að sjá Þór/KA í síðustu leikjum eftir vægast sagt erfiða byrjun á mótinu, meiri andi og meiri trú á hlutunum.
Bestu leikmenn
1. Erin Flurey
Mikil einstaklingsgæði í fyrra marki Þórs/KA og hún gerði vel í því að hjálpa liðinu fremst á vellinum í leiknum.
2. Hulda Ósk Jónsdóttir
Lék mjög vel þennan fyrsta klukkutíma sem hún spilaði, óhrædd að taka andstæðinginn á og lagði upp seinna mark Þórs/KA.
Atvikið
Fyrsta mark leiksins, spretturinn hjá Erin og afgreiðslan. Mjög vel tekið.
Hvað þýða úrslitin?
Þór/KA er komið upp úr fallsæti í bili, fer úr 10. sætinu og upp í það 7. en umferðinni er ekki lokið. ÍBV tapar eftir að hafa unnið tvo leiki í röð og missir af því að komast upp í 3. sætið. Næst á dagskrá hjá Eyjakonum er undanúrslitaleikur í bikar á föstudag og svo er spilað aftur í Bestu deildinni eftir rúma viku. Þessi úrslit þýða að bæði botnliðin í Bestu deildunum unnu 2-1 heimasigra á VÍS vellinum því á laugardag sigruðu Þórsarar Víkinga í Bestu deild karla.
Vondur dagur
Ákvarðanataka ÍBV í sóknum sínum var ekki nógu góð, of mikið af háum boltum sem Arna Sif er sérfræðingur í að eiga við. Hefðu þurft að komast oftar aftur fyrir línuna hjá Þór/KA og gera varnarlínunni erfiðara fyrir. Allison Clark fékk frábært færi á silfurfati í fyrri hálfleik en lét Augur í marki Þór/KA verja frá sér. Það var eitt besta færi leiksins og illa farið með þá gjöf.
Dómarinn - 8
Fannst Guðmundur dæma vel í dag, flautaði ekki of mikið og það er alltaf gott.