Kári Snorrason @karisnorra

- Meðalaldur 26 ár

- Meðalaldur 24 ár

Hvað réði úrslitum? Þrátt fyrir að staðan hafi verið markalaus lengst af var mikil skemmtun á Meistaravöllum. Þá sér í lagi fyrri hluta fyrri hálfleiks. Eftir því sem leið á leikinn varð minna um færi og varð hann að einhverju leyti lokaðri. Það þurfti eitthvað sérstakt til þess að brjóta ísinn og Ármann Ingi gerði nákvæmlega það í uppbótartíma. Fótboltaguðirnir vildu ekki sjá Víkinga hlaupa (lengra) með mótið í dag og tókst KR-ingum að jafna metin með svo gott sem síðustu spyrnu leiksins. Þegar á botninn er hvolft var þetta sanngjarnt jafntefli tveggja bestu liða landsins. Bestu leikmenn 1. Oliver Ekroth Steig heldur betur upp eftir brotthvarf Gunnars Vatnhamars og steig hann varla feilspor. 2. Finnur Tómas Pálmason Í hjarta varnar KR var annar maður sem stóð sig frábærlega og hefur stigið mikið upp á tímabilinu. Á allt hrós skilið en vissulega svekkjandi að þurfa að velja tvo hafsenta í þennan dálk eftir svona stórleik. Atvikið Atvikið er klárlega þegar Haukur Harðarson tók utan um míkrafóninnn um miðbik síðari hálfleiks og kynnti áhorfendatölur. Undirritaður bjóst við tölu rétt norðan þrjú þusund en 4337 varð raunin, sem er það mesta í tólf ár.

Hvað þýða úrslitin? Víkingar eru með átta stiga forystu á toppi deildarinnar fyrir skiptingu. Fari svo að liðið vinni Fram í næstu umferð má fara að óska þeim til hamingju með titilinn. KR og Fram eru jöfn að stigum í 2. og 3. sæti. Vondur dagur Eiður Gauti Sæbjörnsson var minna í boltanum og færum en maður hefði búist við. KR-ingar hafa eflaust viljað fá meira út úr honum. Þá var Valdimar Þór mikið í boltanum og átti heilt yfir prýðisleik. Hann fékk þrjú góð færi á þremur mínútum undir lok fyrri hálfleiks og hefði eflaust viljað nýta eitthvað af þeim. Dómarinn - 5 Ívar Orri og félagar hafa átt betri daga. Víkingum fannst halla á sig í dómgæslunni og ég skil það vel. Hrannar Snær átti að fá vítaspyrnu og svo er spurning með rangstöðumarkið. Það sem undirrituðum þótti hvað verst vera er hversu mikið það var stoppað og hægt á leiknum. Auðvitað óumflýjanlegt í einhverjum atvikum en full mikið fyrir minn smekk.

- Meðalaldur 27 ár

- Meðalaldur 26 ár