FH var sterkari aðilinn stóran hluta leiksins og skapaði sér nóg af góðum stöðum en Stjarnan var gríðarlega þétt til baka og Bridgette Skiba átti mjög góðan leik í markinu. Þolinmæði FH hins vegar og sú staðreynd að þær héldu áfram að leita að markinu alveg fram á síðustu stundu réði að lokum úrslitum.

Það getur ekki verið neitt annað en sigurmarkið! Thelma Lóa fékk boltann úti á kanti á lokamínútu venjulegs leiktíma, keyrði upp völlinn og lagði frábæran bolta út í teiginn. Þar kastaði Andrea Rán sér á boltann og stýrði honum í fjærhornið.

FH svarar 4-1 sigri Breiðabliks á Grindavík/Njarðvík frá því í gær og heldur áfram að fylgja Blikum fast á eftir í baráttunni um Íslandsmeistaratitilinn. Stjarnan hins vegar situr áfram í fjórða sæti og fær ekkert fyrir mjög öfluga frammistöðu í Kaplakrika. Liðið var örfáum andartökum frá stigi en þarf þess í stað að sætta sig við þriðja leikinn í röð þar sem það fær á sig mark undir lokin.

Svo sem enginn leikmaður sem átti eitthvað áberandi slakan dag, mögulega kannski bara sóknarlína beggja liða, varnarleikurinn var upp á tíu sem þýðir þá líka að sóknarleikurinn for forgörðum!

Tapið sest væntanlega mest á Stjörnuleikmennina hins vegar sem voru að tapa 3 leiknum í röð með marki á lokamínútunni!

Hreinn Magnússon og hans teymi áttu heilt yfir góðan og frekar tíðindalítinn dag. Leikurinn var mikill baráttuleikur en dómarateymið hélt góðri stjórn og engin stór umdeild atvik settu mark sitt á leikinn.