Eistar í skýjunum - Vantaði sjö byrjunarliðsmenn gegn Íslandi

Eistland hefði átt öll stigin skilið
Jürgen Henn landsliðsþjálfari Eistlands er greinilega á góðri leið með að búa til mjög öfluga liðsheild. Liðið fékk lof frá Arnari Gunnlaugssyni, landsliðsþjálfara Íslands, og einnig frá íslenskum fjölmiðlamönnum eftir leikinn. Eistneskir fjölmiðlar gefa því líka mikið hrós og segja að það hefði átt skilið að taka öll stigin af Íslandi í gær.

„Eistneska landsliðið sýndi mikinn sigurvilja í öllum fjórum leikjunum í þessum landsliðsglugga og að það er reiðubúið að leggja meira á sig en andstæðingurinn til þess að ná því markmiði. Leikur liðsins einkennist af sjálfstrausti sem hefur byggst upp í kjölfar velgengni. Dyggir stuðningsmenn eru farnir að hafa óbilandi trú á liðinu," skrifar Ojassaar.

Hann segir að þó völlurinn hafi verið talsvert frá því að vera fullur, af stórum hluta vegna tímasetningarinnar á leiknum, þá hafi verið öflugt andrúmsloft og góður stuðningur.

Héldu lykilmönnum Íslands í skefjum
Hákon Arnar, Orri Steinn og Andri Lucas náðu ekki að sýna sínar bestu hliðar í Tallinn. Eistneska liðið náði að halda lykilmönnum í sóknarleik Íslands í skefjum.

„Þetta var virkilega erfitt kvöld fyrir okkur. Eistarnir voru beinskeyttir og ég fílaði liðið þeirra. Þeir voru mjög ‘direct’ og voru að valda okkur miklum vandræðum, sérstaklega í fyrri hálfleik. Við náðum engum takti í pressuna okkar og héldum illa í bolta og vorum að gefa óþarfa langar sendingar án þess að vera í neinni stöðu til að vinna seinni bolta," sagði Arnar Gunnlaugsson, landsliðsþjálfari Íslands, eftir leikinn.

Þrátt fyrir að hafa mistekist að vinna Eistland í tveimur tilraunum er Ísland í bílstjórasætinu í riðlinum þegar tvær umferðir eru eftir. Ísland er með tveimur stigum meira en Eistland og mun í nóvember leika útileik gegn Búlgaríu og heimaleik gegn Lúxemborg. Efsta sæti riðilsins gefur sæti í B-deildinni en liðið í öðru sæti fer í umspil um að komast upp.