Einkunnir Íslands - Engin svör gegn Eistum

Hákon Rafn Valdimarsson - 8, maður leiksins
Aftur er hann maður leiksins gegn Eistum. Kom liðsfélögum sínum vel til bjargar og öruggur í flest öllum sínum aðgerðum.

Daníel Leó Grétarsson - 6
Byrjaði leikinn í vinstri bakverði og leysti það þokkalega. Varð öruggari eftir að hann fór í miðvörðinn um miðbik síðari hálfleiks.

Hörður Björgvin Magnússon - 6
Spilaði rúma klukkustund og lítið hægt að setja út á frammistöðu Harðar.

Stefán Teitur Þórðarson - 6
Stóð sig heilt yfir með prýði í hjarta varnarinnar.

Guðlaugur Victor Pálsson - 6
Byrjaði ágætlega en dró af honum í seinni hálfleik. Kom með lítið sem ekkert að borðinu sóknarlega.

Ísak Bergmann Jóhannesson - 7
Sívinnandi á miðjunni og helst hann sem reyndi að taka af skarið sóknarlega.

Gylfi Þór Sigurðsson - 6
Sá rifbeinsbrotni skilaði inn fínustu vakt. Gerði fá ef einhver mistök og skapaði mikinn usla með stórhættulegu fyrirgjöfum sínum úr föstum leikatriðum.

Mikael Neville Anderson - 6
Manna líflegastur fram á við en vantaði upp á þetta fína.

Hákon Arnar Haraldsson - 5
Í svona leik þurfa leikmenn á borð við Hákon að stíga upp sóknarlega. Skemmst er frá því að segja að Hákon gerði það ekki í dag.

Orri Steinn Óskarsson - 5
Hafandi verið maður leiksins í undanförnum tveimur leikjum er óhætt að segja að frammistaða fyrirliðans hafi verið mikil vonbrigði. Virðist vera fátt um svör þegar Ísland mætir vel skipulagðri fimm manna varnarlínu.

Andri Lucas Guðjohnsen - 5
Eins og með Orra þá komst Andri lítið í takt við leikinn. Enda úr litlu sem engu að moða fyrir framherjaparið í dag. Gerði ágætlega varnarlega en það á ekki að þurfa að horfa í það í leik gegn Eistlandi.

Varamenn:
Logi Tómasson - 6
Brynjólfur Andersen Willumsson - 6