Verður að fylgja reglum til að nota Raphinha

Hann var að skrifa undir nýjan samning við Barca á dögunum en stuðningsmenn félagsins eru smeykir um meiðslahættu vegna mikils leikjaálags. Síðustu tvö meiðsli sem Raphinha hefur orðið fyrir komu í æfingalandsleikjum með Brasilíu.

Carlo Ancelotti landsliðsþjálfari Brasilíu hefur verið gagnrýndur fyrir að nota Raphinha að óþörfu og segist leikmaðurinn ætla að halda áfram að spila fyrir landsliðið en undir sérstökum skilyrðum.

„Ef Ancelotti vill nota mig, þá veit hann að hann þarf að passa upp á leikjaálagið. Hann veit hvað hann þarf að gera, við erum búnir að ræða þetta okkar á milli. Stuðningsmenn ættu ekki að hafa áhyggjur, það verður passað upp á álagið," segir Raphinha.