Átta ára bið Gauja Þórðar eftir tækifæri á Íslandi loks lokið

Guðjón, sem er 64 ára, þjálfaði Grindavík sumarið 2012. Hann gerði þriggja ára samning við félagið en var rekinn eftir fyrsta tímabill eftir fall liðsins úr efstu deild. Viðskilnaður Guðjóns og Grindavíkur var ekki fallegur og endaði í málaferlum.

Sem þjálfari Ólafsvíkinga í Lengjudeildinni mun Guðjón mæta þremur félögum sem hann hefur verið þjálfari hjá. Auk Grindavíkur eru það Keflavík og Vestri (sem þá hét BÍ/Bolungarvík).

Vera Guðjóns hjá Keflavík var þó ekki löng. Eftir að hafa stýrt liðinu undirbúningstímabilið 2005 lét hann af störfum þremur dögum fyrir fyrsta leik til að taka við Notts County.

Fólk virðist ekki einu sinni þora að tala við mann
Það hefur oft gustað í kringum Guðjón og eftir viðskilnaðinn við Grindavík virtist nafn hans hverfa af borðum allra íslenska fótboltafélaga og hann fékk ekki alvöru tækifæri aftur í íslenska boltanum fyrr en nú.

„Fólk virðist ekki einu sinni þora að tala við mann og það er sérstakt. Maður sækir um vinnu og sækir inn á þennan almenna markað. Maður fær ekki mikil viðbrögð," sagði Guðjón í viðtali 2015.

Í fyrra tók hann svo að sér starf í efstu deild í Færeyjum. Hann stýrði NSÍ Runavík í eitt tímabil. Liðið endaði í þriðja sæti en Guðjón lét af störfum eftir tímabilið. Hann var svo orðaður við færeyska landsliðið í kjölfarið en fékk ekki starfið.

Langflestir fótboltaáhugamenn fagna endurkomu Guðjóns í íslenska boltann

Goðsögn í íslenskum fótbolta
Þjálfaraferill Guðjóns er langur og lengst af farsæll. Hann er óumdeild goðsögn í íslenskum fótbolta. stýrði KA óvænt til Íslandsmeistaratitils 1989. Hann tók svo við uppeldisfélagi sínu ÍA eftir fall liðsins úr efstu deild, kom liðinu beint upp og gerði það að Íslandsmeisturum árið eftir.

Hann stýrði svo KR til tveggja bikarmeistaratitla og vann deild og bikar með ÍA áður en hann tók við íslenska landsliðinu. Hann náði frábærum árangri með Íslandi þau þrjú ár sem hann stýrði liðinu.

Eftir að Íslendingar eignuðust Stoke var Guðjón ráðinn knattspyrnustjóri og við tóku þrjú ævintýraleg ár sem oft eru rifjuð upp. Guðjón vann bikarkeppni neðri deilda, Framrúðubikarinn og kom liðinu upp í B-deildina.

Guðjón átti eftir að taka við þremur enskum liðum; Barnsley, Notts County og Crewe Alexandra ásamt því að stýra Start í Noregi.

Byrjar í Breiðholtinu
Síðasta áratuginn hefur Guðjón lítið komið að þjálfun en eftir að Jón Páll Pálmason var rekinn frá Víkingi Ólafsvík ákváðu stjórnarmenn félagsins að óska eftir kröftum hans.

Langflestir fótboltaáhugamenn fagna endurkomu Guðjóns í íslenska boltann og ljóst að mun fleiri augu munu beinast að Ólafsvíkurliðinu en áður. Við hverju má búast?

Ólsarar eru í níunda sæti Lengjudeildarinnar með sex stig að loknum fimm umferðum. Liðið fær Aftureldingu í heimsókn til sín annað kvöld en Brynjar Kristmundsson, aðstoðarþjálfari, stýrir þeim leik.

Eftir leikinn tekur Guðjón svo formlega við og stýrir sínum fyrsta leik á miðvikudaginn, útileik gegn Leikni á Domusnovavellinum í Breiðholti.