Spá Fótbolta.net fyrir Bestu kvenna: 7. sæti

Spáin:
1. ?
2. ?
3. ?
4. ?
5. ?
6. ?
7. ÍBV, 42 stig
8. Keflavík, 22 stig
9. Tindastóll, 20 stig
10. FH, 18 stig

Um liðið: ÍBV hefur frá 2019 endað í neðri hluta Bestu deildarinnar en í fyrra náði liðið sínum besta árangri frá því ári með því að enda í sjötta sæti. Það hafa orðið nokkrar breytingar hjá félaginu í vetur; nýr þjálfari og nokkrir nýir leikmenn. Það verður áhugavert að sjá hvernig það tekst upp og hvernig það gengur að búa til hið fræga Eyjahjarta í liðinu.


ÍBV fagnar marki á síðasta tímabili.

Þjálfarinn - Todor Hristov: Tók við ÍBV í vetur af Jonathan Glenn. Todor kom til Íslands árið 2014, lék fyrst með Víkingi Reyjavík áður en hann flutti austur á Vopnafjörð og lék með Einherja í sex tímabil áður en hann svo flutti til Eyja. Hann hefur verið að þjálfa í yngri flokkum ÍBV undanfarin ár en fær núna stórt tækifæri með meistaraflokki kvenna.


Todor Hristov.

Fótbolti.net fær sérfræðingana Anítu Lísu Svansdóttur og Óskar Smára Haraldsson, sem þjálfa Fram saman, til að rýna í styrkleika, veikleika og margt annað hjá liðunum sem spila í Bestu deild kvenna í sumar. Aníta Lísa fer yfir það helsta hjá liði ÍBV.


Aníta Lísa og Óskar.

Styrkleikar: Eru með mikið af heimastelpum í liðinu. Þrátt fyrir ungan aldur eru margar af þeim búnar að spila mikið og eru komnar með góða reynslu af efstu deild. Helsti styrkleikinn þeirra í ár er að þær héldu í mikilvæga erlenda leikmenn frá síðasta tímabili. Liðið er þannig með góðan kjarna og ágætlega sterkan hrygg fyrir þjálfarann til að byggja í kring um. Svo má ekki gleyma að heimavöllurinn þeirra er einn erfiðasti útivöllur landsins. Það eiga öll lið erfitt með að koma á Hásteinsvöll og sækja stig og vonandi verður engin breyting þar á.

„Það eiga öll lið erfitt með að koma á Hásteinsvöll."

Veikleikar: Eru alltaf mikið spurningarmerki á þessum tíma ársins. Þjálfarinn er nýliði í deildinni og verður áhugavert að fylgjast með honum móta sinn leikstíl. Missa mjög stóra pósta frá því á síðasta tímabili og því alltaf spurning hvort að nýir erlendir leikmenn nái að fylla í þau skörð.



Spurningarnar: Verður nýr þjálfari með sömu gildi og liðið hefur haft undanfarin ár í sterkum og þéttum varnarleik? Eru nýir leikmenn jafn sterkar og þær sem liðið missti eftir síðasta tímabil? Verður Hásteinsvöllur erfiðasti útivöllur landsins?

Þrír lykilmenn: Haley Marie Thomas er að fara inn í sitt annað tímabil með liðinu. Virkilega sterkt að halda henni áfram á Eyjunni. Er fyrirliði liðsins og gríðarlega mikilvæg bæði innan vallar og utan. Olga Sevcova er á sínu fjórða tímabili með liðinu. Þekkir orðið liðið vel, er áræðin og tekur mikið til sín inn á vellinum.
Kristín Erna Sigurlásdóttir er sterkur framherji með mikla reynslu. Skorar alltaf mörk og er með stórt og mikið Eyjahjarta.

„Virkilega sterkt að halda henni áfram á Eyjunni."


Haley Marie Thomas.

Leikmaður sem á að fylgjast með: Berta Sigursteinsdóttir er ungur og efnilegur sóknarmaður fædd 2005. Hefur verið að starta á undirbúningstímabilinu og sýnt fína takta þar. Er með góða markatölfræði úr yngri flokkum og verður því spennandi að sjá hvort hún fái stærra hlutverk í sumar en áður og hvort hún nái að skora einhver mörk í Bestu deildinni.


Olga Sevcova verður í lykilhlutverki hjá ÍBV í sumar.

Völlurinn: Hásteinsvöllur stendur á einu fallegasta vallarstæði í heimi og grasvöllurinn sjálfur oftast í frábæru standi. Eins og Aníta Lísa nefnir er þetta einn erfiðasti útivöllur landsins til að fara á og ekki auðvelt að sækja þrjú stig þar. Menn eiga það til að missa sig á bílaflautunum við völlinn en það er líka bara skemmtilegt.


Hásteinsvöllur.

Komnar
Camila Pescatore frá Bandaríkjunum
Caeley Lordemann frá Bandaríkjunum
Holly O'Neill frá Kanada
Kristjana Sigurz frá Breiðabliki

Farnar
Auður Sveinbjörnsdóttir Scheving í Stjörnuna (var á láni frá Val)
Ameera Abdella Hussen
Hanna Kallmaier til Vals
Lavinia Elisabeta Boanda til Ítalíu
Madison Wolfbauer í Keflavík
Sandra Voitane í Keflavík
Þórhildur Ólafsdóttir í Keflavík


Kristjana Sigurz sneri aftur til ÍBV.

Dómur Anítu fyrir gluggann: Alltaf erfitt að spá í nýja erlenda leikmenn áður en mótið byrjar. Þær hafa stór skörð til að fylla í og alveg spurning hvort að þær nái því. Geri ráð fyrir að þjálfarinn hafi unnið sína heimavinnu vel og að þetta séu leikmenn sem munu styrkja liðið mikið. Gef þessu 6 í einkunn en gæti vel orðið 10 ef allt smellur!

Líklegt byrjunarlið:


Leikmannalisti:
12. Valentina Quinones (m)
30. Guðný Geirsdóttir (m)
2. Ragna Sara Magnúsdottir
3. Júlíana Sveinsdóttir
4. Caeley Lordemann
5. Camila Pescatore
6. Thelma Sól Óðinsdóttir
7. Þóra Björg Stefánsdóttir
8. Kristjana Rún Sigurz
9. Kristín Erna Sigurlásdóttir
10. Holly Taylor O'Neill
14. Olga Sevcova
15. Selma Björt Sigursveinsdóttir
16. Elísabet Sigurjónsdóttir
17. Vika Zaychikova
18. Haley Thomas (f)
19. Sara Sindradóttir
22. Rakel Perla Gústafsdóttir
23. Embla Harðardóttir
24. Helena Jónsdóttir
25. Inga Dan Ingadóttir
27. Erna Sólveig Davíðsdóttir
28. Anna Margrét Svansdóttir

Fyrstu fimm leikir ÍBV:
25. apríl, ÍBV - Selfoss (Hásteinsvöllur)
2. maí, Stjarnan - ÍBV (Samsungvöllurinn)
7. maí, ÍBV - Þór/KA (Hásteinsvöllur)
15. maí, ÍBV - Þróttur R. (Hásteinsvöllur)
23. maí, Valur - ÍBV (Origovöllurinn)

Í besta falli og versta falli að mati Anítu: Þær enda í 6. sæti í deildinni í fyrra og við erum að spá þeim í 7. sæti núna. Flest lið vilja gera betur en árið á undan og því hugsa ég að í besta falli getur ÍBV lent í 5. sæti. Það er því miður erfitt að spá þeim ofar en það og það þarf líka allt að smella til að 5. sæti verði að raunveruleika.

Í versta falli þá endar liðið í 9. sæti og fellur þar með niður um deild. Mig langar ekki að setja þær í neðsta sæti af því ég held að það muni aldrei gerast. Ef þær falla þá verður það tæpt og 9. sætið því versta staðan sem getur komið upp.

Spámennirnir: Alexandra Bía Sumarliðadóttir, Guðmundur Aðalsteinn Ásgeirsson, Helga Katrín Jónsdóttir, Hulda Mýrdal Gunnarsdóttir, Lilja Dögg Valþórsdóttir, Mist Rúnarsdóttir, Orri Rafn Sigurðarson, Sigríður Dröfn Auðunsdóttir, Sverrir Örn Einarsson, Sæbjörn Þór Þórbergsson Steinke.