Byrjunarlið Íslands: Gummi Tóta og Daníel byrja - Sverrir fyrirliði

Landsliðsþjálfarinn Age Hareide hefur opinberað liðið sem hefur leik gegn Ísrael klukkan 19:45. Liðin mætast í undanúrslitum umspilsins. Sigurliðið fer áfram í úrslitaleik um eitt laust sæti á EM í sumar.

Leikurinn er í opinni dagskrá á Stöð 2 Sport og í beinni textalýsingu hér á Fótbolti.net.

Liðið hjá Hareide kemur aðeins á óvart. Fótbolti.net setti í aðdraganda leiksins upp líklegt byrjunarlið og eru tvær breytingar frá því liði. Daníel Leó Grétarsson er við hlið Sverris Inga í hjarta varnarinnar og Guðmundur Þórarinsson er í vinstri bakverði. Sverrir er með fyrirliðabandið í fjarveru Jóhanns Bergs Guðmundssonar.