Hákon Arnar Haraldsson. Þessi mynd er ekki tekin í kuldanum í Kanada!
Hákon og Jonathan David náðu feikilega vel saman hjá Lille.
Hákon Arnar Haraldsson, lykilmaður í íslenska landsliðinu, ræddi við Fótbolta.net á liðshótelinu í Kanada en framundan eru tveir vináttulandsleikir í Toronto; gegn Kanada á laugardaginn og svo við Haítí á þriðjudag.
Hvað viljum við sjá í þessum glugga?
Hvað viljum við sjá í þessum glugga?
„Við viljum halda áfram að bæta okkar leik. Þetta eru mjög góðir leikir til að gera það, varnarlega og sóknarlega. Mér fannst við fá á okkur of mörg mörk gegn Úkraínu, við fáum á okkur sjö mörk gegn Úkraínu í tveimur leikjum og það er of mikið ef við ætlum okkur að fara á EM," segir Hákon.
„Leikmennirnir sem við erum að fara að mæta hafa helling að keppa um. Þeir eru að berjast um að vera í HM hópnum. Þetta verður ekki beint æfingaleikjafílingur og ég býst við að það verði fullt af fólki á leiknum gegn Kanada. Þetta verður skemmtilegt verkefni til að takast á við."
Gaman að hitta hann aftur
„Við erum að fara að mæta mjög sterku liði og góðum einstaklingum. Þeir eru mjög sterkir og fá ekki mörg mörk á sig. Þeir pressa mikið og við þurfum að búa okkur undir það," segir Hákon um Kanada.
Skærasta stjarna Kanada er sóknarmaðurinn Jonathan David sem spilar fyrir Juventus. David gekk í raðir ítalska félagsins í fyrra eftir að hafa spilað með Hákoni hjá Lille en þeir tveir náðu gríðarlega vel saman á vellinum.
„Það var mjög leiðinlegt að missa hann. Hann er ógeðslega góður í fótbolta og er fótboltaheili. Við náðum vel saman en það var skiljanlegt fyrir hann að taka skref upp á við. Hann var búinn að vera þarna í fimm ár og vinna titil. Maður skilur hann vel."
„Það verður gaman að hitta hann aftur. Maður fær aðeins meiri löngun í að vinna því maður þekkir hann vel. Þetta verður mjög gaman."
Viðtalið við Hákon má sjá í heild í sjónvarpinu hér að ofan en þar tjáir hann sig meðal annars um endurkomu Orra Steins Óskarssonar, gengi Lille og drauma um ensku úrvalsdeildina.
