Danski varnarmaðurinn Rasmus Christiansen er ekki að stressa sig á að taka ákvörðun um það hvar hann spilar næsta sumar. Rasmus varð samningslaus í síðustu viku.
„Ég er að ræða við Val og ég hef heyrt í öðrum liðum líka," sagði Rasmus við Fótbolta.net í dag.
„Það er ekki mikið stress hjá mér. Þetta kemur í ljós eftir nokkrar vikur eða mánuð."
Ramsus var meðal annars orðaður við Keflavík í slúðurpakka Fótbolta.net í vikunni.
Rasmus spilaði þrettán leiki í Pepsi-deildinni með Íslandsmeisturum Vals í sumar. Hann stóð vaktina í vörn liðsins í byrjun móts en missti síðan sæti sitt til Eiðs Arons Sigurbjörnssonar.
Hinn 28 ára gamli Rasmus spilaði fyrst á Íslandi með ÍBV árið 2010 en hann hefur einnig leikið með KR hér á landi. Samtals hefur hann skorað þrjú mörk í 136 deildar og bikarleikjum á ferlinum.
Athugasemdir