Síðasti leikur dagsins í ensku úrvalsdeildinni var Lundúnarslagur West Ham og Arsenal á Ólympíuleikvangnum í Lundúnum en liðin eru að berjast á sitthvorum enda töflunnar.

Gæðamunurinn sást augljóslega í dag en Mesut Özil kom Arsenal yfir á 24.mínútu eftir undirbúning Alexis Sanchez.

Þannig hélst staðan allt þar til á 72.mínútu þegar Sanchez fór að leiðast þófið og ákvað að gera endanlega út um leikinn en hann skoraði þrjú mörk á síðustu 20 mínútunum.

Andy Carroll klóraði í bakkann fyrir heimamenn og minnkaði muninn í 1-3 þegar hann fylgdi á eftir aukaspyrnu Dimitri Payet en Alex Oxlade-Chamberlain svaraði að bragði fyrir gestina.

Lokatölur 1-5 fyrir Arsenal sem sitja í öðru sæti, þrem stigum á eftir toppliði Chelsea. West Ham er hinsvegar í alls kyns vandræðum og hefur aðeins innbyrt tólf stig í vetur.