Klopp var spurður út í hollenska miðvörðinn á fréttamannafundi í dag.

„Býstu við því að ég svari þessari spurningu? Um eitthvað sem gerðist í sumar? Ég hef ekkert um þetta að segja," svaraði Klopp.

Hann var þá spurður að því hvort það yrði erfitt fyrir Van Dijk að spila á Anfield á morgun en Southampton mætir í heimsókn.

„Vonandi. Það á að vera erfitt fyrir alla leikmenn að spila á Anfield. Vonandi verður það erfitt fyrir hann."

Klopp var ferskur á fréttamannafundinum og sagði að heilsan væri góð en hann fór í skoðun á sjúkrahúsi eftir að hann kom heim úr ferðalagi til Suður-Afríku.

Klopp var einnig spurður út í meiðslamálin hjá Liverpool.

„Við þurfum að bíða með Sadio Mane, hann verður skoðaður í dag. Adam Lallana hefur æft síðustu þrjá daga og það er frábært að fá hann til baka en við flýtum okkur ekki of mikið," segir Klopp.

„Við eigum þrjá leiki í næstu viku og Adam er ekki að fara að spila 90 mínútur á morgun."