Veislan heldur áfram í spænska boltanum í dag, en það eru fjórir leikir í spænsku úrvalsdeildinni á dagskrá í dag. Leikið er í 13. umferð deildarinnar.

Þeir sem vilja horfa á stærstu liðin í spænska boltanum geta sofið út. Fyrsti leikur dagsins hefst klukkan 12:00, en sá leikur er á milli Malaga og Deportivo La Coruna.

Klukkan 15:15 mæta stórstjörnurnar í Real Madrid til leiks. Þeir mæta Sporting Gijon, sem er í fallsæti, og geta með sigri náð sjö stiga forskoti á erkifjendurna í Barcelona.

Espanyol leikur gegn nýliðum Leganes og þá er lokaleikur dagsins á milli Sevilla og Valencia. Sevilla er í þriðja sæti deildarinnar, en það hefur ekki gengið eins vel hjá Valencia, sem er við botninn.