Heimild: Morgunblaðið 

„Tölfræðin hjá mér hvað varðar mörk og stoðsendingar er frábær og ég er mjög ánægður með það. Nú er bara að reyna að bæta fleirum við á báðum sviðum. Ég held að þetta sé mitt besta tímabil og það hefur gengið sérlega vel hjá mér eftir jól og áramót. Liðinu hefur líka gengið betur og þetta helst í hendur," segir Gylfi í viðtali við Morgunblaðið.

Vangaveltur hafa verið uppi um hvar Gylfi mun spila á næsta tímabili en alveg ljóst er að stærri félög vilja fá hann í sínar raðir.

„Þessi mál eru öll í höndum umboðsmanns míns. Ég er ekkert að velta þessum hlutum fyrir mér. Ég er bara einbeittur á Swansea og ætla að gera allt sem ég get til að halda liðinu uppi. Við erum langt í frá öruggir með sæti okkar og ég sé svo bara til hvað gerist eftir tímabilið."

Í viðtalinu er Gylfi einnig spurður út í íslensku leikmennina í B-deildinni sem flestir hafa átt erfitt uppdráttar á tímabilinu. Ragnar Sigurðsson, Birkir Bjarnason og Hörður Björgvin Magnússon hafa ekki fest sig í sessi hjá sínum liðum.

„Fótboltinn er upp og niður og þeir verða að halda áfram og komast í gegnum þetta. Enska B-deildin er gríðarlega erfið deild og það tekur tíma að ná áttum í henni. Ég á fastlega von á að Birkir, Raggi og Hörður nái sér á strik fyrr en seinna. Þeir eru vanir því að gefast ekki upp og þeir komast í gegnum þetta," segir Gylfi í Morgunblaðinu.