Öruggur sigur Valsstúlkna á Akranesi.

ÍA og Valur áttust við á Norðurálsvellinum á Akranesi fyrr í kvöld í Pepsi-deild kvenna.
Aðstæður til fótboltaiðkunar voru mjög góðar, skýjað og nánast logn, svona eins og yfirleitt á Akranesi. Norðurálsvöllurinn var gullfallegur að vanda og áhorfendur voru um 210.

Valsstelpur byrjuðu leikinn vel og skoruðu fyrsta markið strax á 2. mínútu. Þar var á ferðinni Katrín Gylfadóttir, sem skoraði eftir aukaspyrnu sem kom utan af hægri kanti eftir klafs í teignum. Aukaspyrnan var laus, en skoppaði í gegnum pakkann í vörninni og endaði hjá Katrínu, sem setti hann í vinstra hornið.
Valur hafði undirtökin meira og minna allan leikinn og bættu við sínu öðru marki á 26. mínútu. Þá komst Elín Metta ein inn fyrir vörn Skagamanna eftir stungusendingu. Smá klaufagangur í vörn Skagamanna, en Elín Metta kláraði vel og lagði boltann í hægra hornið. 2-0.
Síðasta mark Vals kom á 57. mínútu eftir góða sókn. Dóra María kom upp hægri kantinn og kom boltanum fyrir í annarri tilraun. Elín Metta kom á ferðinni, ein inni í teig og setti boltann í netið og fullkomnaði 3-0 sigur Vals.

Öruggur 3-0 sigur Vals staðreynd. Þær náðu oft á tíðum mjög góðu spili og góðum sóknum. Þær áttu hættulegri færi í dag og nýttu þau vel. Skagastelpur náðu þó góðu spili á köflum og náðu að stríða sterku liði Vals, þó þær voru meira í hálffærum í leiknum.