Júlíus Magnússon er enn á meiðslalistanum hjá Víkingum. Þessi eðaldrengur og flotti fótboltamaður er búinn að koma sér fyrir í stúkunni. Víkingar hafa saknað hans af miðsvæðinu.

Ég held að Víkingar vinni keppnina um besta vallarborgarann... fjölmiðlamenn eru vel nærðir og leikmenn hafa lokið upphitun. Rosa stutt í leik!

Miðað við taktíska uppstillingu samfélagsmiðla Víkings verður Kári Árnason djúpur á miðjunni í dag. Bíðum og sjáum hvað verður...

Það vantaði allavega talsvert jafnvægi á miðjuna hjá Víkingum í síðasta leik þar sem Arnar Gunnlaugs fyllti liðið af sóknarsinnuðum leikmönnum.

Byrjunarliðin eru mætt.

Halldór Smári Sigurðsson kemur inn í byrjunarliðið og Nikolaj Hansen dettur út úr Víkingsliðinu.

Róbert Aron Eysteinsson og Breki Ómarsson fara á bekkinn hjá ÍBV en Jonathan Franks og Priestley Griffiths koma inn í stað þeirra.

Arnar Gunnlaugsson, þjálfari Víkings, talaði hreint út eftir síðasta leik. Eins hreint og hægt er. Ef þú ert ekki búinn að horfa á það magnaða viðtal þá er hægt að finna það hérna.

Víkingur tapaði fyrir Stjörnunni í síðustu umferð, 2-1 fóru leikar en Óttar Magnús Karlsson skoraði mark Víkings. Óttar kemur með meira bit í sóknarleik Víkinga, eitthvað sem þeim hefur sárlega vantað. Ég hlakka mikið til að sjá þennan hæfileikaríka sóknarmann í dag.

Getur lið með Sölva og Kára í vörninni og Óttar Magnús í fremstu víglínu fallið úr þessari deild? Ég trúi ekki öðru en að svarið sé nei... en maður veit aldrei.

ÍBV er með lélegasta lið deildarinnar og í Eyjum eru menn þegar farnir að undirbúa Inkasso-deildina á næsta ári. Liðið hefur ekkert náð að rétta úr kútnum þrátt fyrir þjálfaraskipti.

Víkingar eru með 16 stig og eru aðeins markatölunni frá því að vera í fallsæti. Liðið hefur fengið hrós fyrir skemmtanagildi en stigasöfnunin hefur ekki verið eftir væntingum. Það stefnir í svaðalega fallbaráttu og ljóst að lið gæti farið niður með metfjölda stiga.

Góðan og gleðilegan daginn og verið velkomin með okkur í beina textalýsingu frá Víkingur - ÍBV í 16. umferð Pepsi Max-deildarinnar. Lögregluvarðstjórinn Pétur Guðmundsson flautar til leiks á heimavelli hamingjunnar klukkan 16:00.