Margir Seltirningar mættir í blíðuna á Akureyri. Vonandi verður góð stemning á leiknum og við fáum að sjá fínan fótbolta!

Ég sé kerfi KA sem 4-3-3. Enginn náttúrulegur vinstri bakvörður í byrjunarliði KA og ég skýt því á að annaðhvort Hrannar Björn eða Andri Fannar leysi þá stöðu.

Hólmbert Aron Friðjónsson, leikmaður Álasund var fenginn til þess að spá í 7. umferð Pepsi Max deildarinnar og spáir hann KA 2-0 heimasigri.

,,Það er stígandi í þessu hjá Gróttu finnst mér. KA menn sigla þessu samt heim á grasinu á Akureyrarvelli og 3 stig í fyrsta leik hjá Adda G.''

Óli Stefán sendi svo frá sér yfirlýsingu þar sem að hann þakkaði fyrir sig. Hann talaði í skemmtilegu myndmáli og sagði að sér hefði verið treyst fyrir því að stýra skútunni ákveðna leið, þó leiðin hafi kannski ekki alltaf verið bein þá hefði stefnan ávallt verið skýr.
Hann lýsti því sem forréttindum að hafa fengið að stýra KA og að hafa unnið með fólkinu í kringum félagið.

,,Nú tekur nýr skipstjóri við og ég óska honum alls hins besta með þá heitu ósk um að hann komi skútunni í þá leið sem óskað er eftir. Það mikilvægasta hjá mér er að fara yfir liðinn tíma með gagnrýnis gleraugun á. Ég þarf að skoða þau mistök sem að ég hef sjálfur gert. Sumt sé ég mjög skýrt nú þegar en það tek ég með mér áfram og læri af.''

KA menn tilkynntu í miðri viku að Óli Stefán Flóventsson væri hættur þar sem að báðir aðilar töldu að þörf væri á breytingum.
Samdægurs var það svo staðfest að Arnar Grétarsson væri staðgengill Óla Stefáns og myndi taka við út tímabilið.

Varðandi hvernig ráðningin hefði komið til sagði Arnar:

,,Aðdragandinn var eins stuttur og þeir gerast. Ég heyrði í þeim í gær. Þetta gerðist einn, tveir og bingó.''

Arnar var svo spurður í lok viðtals hvort að möguleikinn væri fyrir hendi að vera lengur en út tímabilið.

,,Við ætlum að skoða það þegar nær dregur. Ég útiloka ekki neitt í þeim efnum. Við ætlum að byrja á þessu. Við vorum sammála um það. Svo tökum við næstu skref í framhaldinu.''

Viðtalið má lesa í heild sinni hér.

Seltirningar nældu í sinn fyrsta sigur í 5. umferð þegar þeir unnu góðan útisigur á Fjölni. Áður höfðu þeir gert 4-4 jafntefli við HK í frábærum fótboltaleik, en fengu svo skell í síðasta leik þegar að þeir urðu ÍA að bráð - 4-0 var niðurstaðan þar. Gróttuliðið hefur verið að tapa leikjum sínum ansi stórt þegar leikirnir hafa tapast, en ég býst við hörkuleik hér í dag.

Það er mikið undir og bæði lið munu selja sig dýrt til að ná í stigin þrjú.

KA menn eru í dauðaleit að sínum fyrsta sigri og voru grátlega nærri því að landa honum þegar Breiðablik mætti í heimsókn og gerði dramatískt 2-2 jafntefli, þar sem að bæði lið skoruðu í uppbótartíma. Það loðir oft við lið neðarlega í töflunni að lítið detti með þeim og það reyndist hverju orði sannara þann daginn.
Síðan þá hafa Akureyringar tapað 4-1 fyrir Fylki og gert 1-1 jafntefli við neðsta lið deildarinnar, Fjölni.

Góðan daginn! Hér mun fara fram textalýsing á leik KA og Gróttu í Pepsi Max deild karla.

Leikurinn er sannkallaður sex stiga leikur þar sem að Grótta getur með sigri slitið sig örlítið frá neðstu liðunum tveimur, KA og Fjölni. KA menn eiga þó leik til góða.