Liðin eru að ganga út á völlinn, allt að verða klárt!

Byrjunarliðin komin inn!

Valur gerir tvær breytingar á liði sínu frá jafnteflinu við ÍBV í síðustu umferð. Cyera Makenzie Hintzen og Þórdís Elva koma inn fyrir Þórdísi Hrönn og Ásgerði Stefaníu.

Afturelding gerir fimm breytingar frá stóra tapinu gegn Blikum í síðustu umferð. Eva Ýr kemur í markið fyrir Auði Scheving sem má líklega ekki spila þennan leik þar sem hún er á láni frá Val. Jade Arianna Gantile, Sara Jimenzes Garcia, Birna Kristín og Þórhildur Þórhalls koma svo inn í liðið og Dennis Chyanne, Hildur Karítas, Sigrún Eva setjast á bekkinn og svo dettur Sólveig Larsen einnig út en hún er í banni eftir að hafa fengið rautt spjald í síðasta leik. Hún hefði þó líklega ekki mátt spila í kvöld þar sem hún er á láni frá Val.

Arna Sif Ásgrímsdóttir, miðvörður Vals hefur leikið frábærlega á tímabilinu og er búin að vera besti leikmaðurinn í fyrsta þriðjungi Bestu deildar kvenna að mati Heimavallarins.

Nú þegar það styttist í að EM hópurinn verði tilkynntur hefur verið rætt um Örnu Sif og hvort Steini landsliðsþjálfari geti horft framhjá henni. Eftir sigur Vals á Breiðablik skaut Pétur Pétursson þjálfari Vals á landsliðsþjálfarann: Ég ætla bara að segja það, Þorsteinn Halldórsson, farðu að velja Örnu Sif í landsliðið."

Arna Sif er komin með þrjú mörk í sumar en hún er gríðarlega sterk í loftinu og er ljóst að leikmenn Aftureldingar þurfa að hafa góðar gætur á henni í kvöld.

Óskar Smári Haraldsson, þjálfari Fram í 2. deild kvenna spáði í 8. umferðina á Fótbolti.net og svona er spáin hans fyrir þennan leik:

Valur 4 - 1 Afturelding
Meiðsli hafa sett stórt strik í reikninginn hjá Mosfellingum þetta árið. Þrátt fyrir það hafa þær borið höfuðið hátt og munu valda Val vandræðum til að byrja með. Afturelding kemst yfir með marki frá Sigrúnu Gunndísi eftir hornspyrnu, en gæðin í liði Valsstúlkna eru mikil og munu þær stjórna öllu inn á vellinum í síðari hálfleik. Arna Sif mun skora tvisvar og heldur áfram að gera sterkt tilkall til landsliðssætis. Ída Marín og Elín Metta sjá svo um hin tvö mörkin. Alexander Aron fær gult á hliðarlínunni fyrir litlar sakir.

Skoðaðu alla spána hér!


Óskar Smári

Helgi Ólafsson sér um dómgæsluna í kvöld og verður með Przemyslaw Janik og Hrein Magnússon sér til aðstoðar. Eftirlitsmaður er Ólafur Ingi Guðmundsson.

AFTURELDING

Byrjunin á mótinu hefur verið erfið hjá Aftureldingu sem situr í næst neðsta sæti með 3 stig eftir 7 umferðir. Þær hafa skorað 8 mörk og fengið á sig 21 mark.

Í síðustu umferð fengu þær Blika í heimsókn og töpuðu 6-1. Hildur Karítas skoraði mark Aftureldingar á 55. mínútu og minnkaði muninn í 2-1 en Blikar voru fljótar að svara og bættu bara í.

VALUR

Valur situr á toppi deildarinnar með 16 stig eftir 7 umferðir. Þær hafa skorað flest mörk allra liða í sumar eða 19 mörk og fengið á sig fæst mörk eða 4 mörk.

Í síðustu umferð gerðu þær 1-1 jafntefli við ÍBV á heimavelli, en ÍBV komst yfir á 48. mínútu og jafnaði Ásdís Karen leikinn og tryggði Val stig í uppbótartíma.

Góða kvöldið kæru lesendur og verið velkomin í beina textalýsingu frá Origo vellinum þar sem Valur tekur á móti Aftureldingu í 8. umferð Bestu-deildar kvenna.

Leikar hefjast kl. 20:15!