Sigurður Hjörtur Þrastarson leiðir liðin inn á völlinn og fyrirliðarnir heilsast.

Styttist í upphafsflautið.

Ásta Eir spáir! Ásta Eir Árnadóttir spáir í leikina í þessari umferð. Ásta er fyrirliði kvennaliðs Breiðabliks.

Fylkir 2 - 4 Breiðablik
Blikastrákarnir elska að skora á Wurth, en elska líka að fá á sig mörk þar. Þetta verður annar markaleikur. 2-4 sigur Blika.

Byrjunarliðin eru klár! Þjálfarar liðanna hafa opinberað byrjunarlið sín.

Rúnar Páll Sigmundsson gerir þrjár breytingar á sínu liði frá tapinu stóra gegn Val í síðustu umferð. Ragnar Bragi Sveinsson, Orri Sveinn Stefánsson og Emil Ásmundsson koma allir inn í liðið. Ásgeir Eyþórsson er ekki með í kvöld en hann er frá vegna meiðsla þá er Elís Rafn Björnsson einnig utan hóps hjá Fylki. Benedikt Darius Garðarsson fær sér sæti á bekknum.

Óskar Hrafn Þorvaldsson þjálfari Breiðablik gerir tvær breytingar frá sigrinum gegn Stjörnunni í síðustu umferð. Patrik Johannesen og Andri Rafn Yeoman eru báðir utan hóps hjá Breiðablik. Klæmint Andrasson Olsen og Davíð Ingvarsson koma inn í liðið í þeirra stað.



Ekki með í kvöld.

Í gír í Garðabænum

Anton Ari Einarsson markvörður Breiðabliks fór illa af stað á mótinu en hann var í liði umferðarinnar í síðustu umferð, eftir 2-0 sigurinn gegn Stjörnunni í Garðabæ. Anton átti tvær svakalegar vörslur.

„Fyrri markvarslan er bara á heimsmælikvarða. Það var í stöðunni 2-0 og Stjörnumenn að sækja á Blikana. Ef þeir hefðu skorað þar þá hefðu heimamenn verið til alls líklegir. Gott fyrir Anton að ná svona leik inn af því að hann er ekki búinn að vera góður í ár. Kannski er þetta einhver vendipunktur á hans tímabili, það er hægt að segja að hann hafi jafnvel bjargað stigum fyrir þá. Varslan eftir skallann var flottari, markmannshjartað mitt tók auka kipp þar, en báðar voru þetta mjög góðar vörslur. Hann var virkilega sterkur í leiknum," sagði Valur Gunnarsson, fyrrum markvörður og markvarðaþjálfari Leiknis, í Innkastinu.

Miðvarðavandræði hjá Fylki

Orri Sveinn Stefánsson var ekki með Fylki í síðasta leik og þá fór fyrirliðinn Ásgeir Eyþórsson af velli, meiddur aftan í læri. Hann verður væntanlega ekki með í kvöld.

Breiðablik vann 2-0 útisigur gegn Stjörnunni í síðustu umferð

Blikar eru með níu stig eftir fimm umferðir.

„Við erum bara þar sem við erum, ég veit ekki einu sinni í hvaða sæti við erum enda skiptir það engu máli. Það er heilt mót eftir 22 umferðir. Ég bið alla sem eru að spá liðum norður og niður eða upp að anda með nefinu og muna það að það eru 22 umferðir eftir," sagði Óskar Hrafn Þorvaldsson þjálfari Blika eftir sigurinn gegn Stjörnunni í síðustu umferð.

Fylkir fékk 1-6 skell gegn Val í síðustu umferð

Árbæingar eru aðeins með þrjú stig eftir fyrstu fimm umferðirnar í Bestu deildinni og var Rúnar Páll spurður út í uppskeruna eftir 1-6 tap gegn Val í síðustu umferð.

„Ég hefði nú alveg vilja fá meira út úr leikjunum á móti Keflavík og HK, það voru svona leikir sem við reiknuðum með að fá einhver stig út úr. Þetta verður töff fyrir okkur í sumar og við þurfum okkar besta leik alltaf og fækka þessum barnalegu mistökum sem við erum að gera í varnarleiknum og við náum að þétta það aðeins þá verður þetta allt í lagi."

Rúnar Páll Sigmundsson var spurður út í leikmanna hópinn og hvort hann væri sáttur með þann leikmannahóp sem hann væri með í höndunum nú þegar eða hvort hann hafi reynt að styrkja hópinn eitthvað.

„Ég hef mikla trú á þessum leikmannahópi, það er margt mjög gott í þessum hópi og vel spilandi lið. Við höfum spilað vörnina hingað til ágætlega. Það er alltaf talað um að fá einhverja leikmenn en fjárhagsstaða liðanna er kannski bara þannig að það er ekkert hægt að gera neitt mikið meira og við erum bara þar. Það er bara ekki að fá leikmenn, þetta kostar allt mikla peninga, það þarf að borga þeim og standa við greiðslur."

Dómari: Sigurður Hjörtur Þrastarson

Aðstoðardómari 1: Gylfi Már Sigurðsson
Aðstoðardómari 2: Andri Vigfússon
Fjórði dómari: Arnar Þór Stefánsson
Eftirlitsmaður: Kristinn Jakobsson

Olgeir Sigurgeirsson - næst leikjahæsti leikmaður Breiðabliks frá upphafi - er aðstoðarþjálfari Fylkis. Olgeir, eða Olli, spilaði 321 leiki og skoraði 39 mörk í grænu Breiðablikstreyjunni á 13 árum frá 2003 til 2015. Hann var lengi vel leikjahæsti leikmaður meistaraflokks karla eða allt þar til Andri Rafn Yeoman spilaði sinn 322. mótsleik fyrir félagið í júlí 2019, en Andri Rafn er nú lang leikjahæsti leikmaður Breiðabliks frá upphafi með 409 mótsleiki. (heimild: blikar.is)

Heil og sæl Velkomin með okkur í Lautina þar sem Fylkir tekur á móti Íslandsmeisturum Breiðabliks klukkan 20:15. Leikurinn verður 64. mótsleikur liðanna – fá upphafi. Fyrsti innbyrðis leikur liðanna var í 16-liða úrslitum Bikarkeppni KSÍ árið 1978. Blikar hafa yfirhöndina í þessum mótsleikjum með 34 sigra gegn 16 - jafnteflin er 13. (heimild: blikar.is)

Textalýsingar kvöldsins 20:15 Fylkir - Breiðablik
19:15 FH - Keflavík
19:15 Fram - Stjarnan
18:00 ÍBV- Víkingur