SKÝRSLAN: Árni Vill stimplaði sig inn af snilld
Hvað réði úrslitum?
Breiðabliksliðið mætti ákveðið til leiks og takturinn í sóknarleik liðsins var allt annar með tilkomu Árna Vilhjálmssonar. Breiðablik hefur frábæran markvörð og býr yfir öflugum varnarleik. Það telst ansi gott að halda hreinu gegn Fjölni. Þegar hlutirnir fara að smella sóknarlega líka eru Blikarnir ansi góðir!
Bestu leikmenn
1. Árni Vilhjálmsson - Breiðablik
Lagði upp öll þrjú mörkin, spilaði ákaflega vel fyrir liðið og var gríðarlega vinnusamur. Glæsileg frammistaða hjá Árna.
2. Damir Muminovic - Breiðablik
Miðverðirnir báðir og markvörðurinn áttu afskaplega góðan leik hjá Breiðabliki. Fjölni haldið í núllinu sem er vel gert.
Atvikið
Í stöðunni 2-0 fyrir Breiðabliki tók Þórir Guðjónsson vítaspyrnu og hefði getað opnað leikinn upp á gátt. Gunnleifur varði spyrnuna vel.
Hvað þýða úrslitin?
Spennan í deildinni heldur áfram. Skyndilega eru Blikar komnir upp að hlið Fjölnis, bæði lið með 19 stig í 3. - 4. sæti deildarinnar.
Vondur dagur
Margir hjá heimamönnum sem ekki náðu sér á strik í kvöld en þennan titil fær bakvörðurinn Mario Tadejevic. Hann var fíflaður upp úr skónum í fyrsta marki leiksins, Arnór Sveinn Aðalsteinsson fór illa með hann. Viðvörunarbjöllur höfðu hringt nokkru áður þegar Arnór hafði leikið sama leik.
Dómarinn - 9
Þorvaldur Árnason með öll tök á þessum leik. Dómarinn í aukahlutverki og það er gott. Hárréttur vítaspyrnudómur.