TIL HAMINGJU VALUR!!! Óli Jó kann svo sannarlega á bikarúrslitaleiki. Valsliðið miklu miklu betra liðið í dag. Eyjamenn sköpuðu sér sáralítið og voru að auki óöruggir varnarlega. Viðtöl, einkunnir og fleira gómsætt á leiðinni. Njótið.

Uxinn kom sér í færi en það var frekar þröngt. Anton Ari varði. Uppbótartíminn: 2 mínútur.

Sigurður Egill er til í þrennuna! Með skot naumlega yfir.

Aron Bjarnason með góð tilþrif og býr til lofandi sókn sem Mikkel Maigaard klúðrar svo. Rosalega erfitt hjá Eyjamönnum að tengja sendingar.

Hættuleg sókn Vals... ÍBV bjargar í horn.

Valsmenn eru í varnargír. Það hefur gengið býsna vel hjá þeim. Eyjamenn eru lítið að ná að ógna.

Hættuleg aukaspyrna ÍBV! Haukur Páll skallar naumlega framhjá eigin marki.

Áhorfendatölur komnar. 3.511 á vellinum í dag.

ÞARNA SKALL HURÐ NÆRRI HÆLUM! Hættuleg sókn Eyjamanna en á síðustu stundu náði Valur að hreinsa frá.

Valsmenn eru algjörlega með þennan leik í sínum höndum.

Tréverkið. Anton Ari kýlir boltann frá, Mikkel Maigaard með vippuskot í fyrsta og boltinn í samskeytin!

Barden í tómu veseni! Missir boltann frá sér og þetta endar með skoti framhjá frá Sigga Lár. Barden langt frá því að vera sannfærandi.

Skemmtileg skottilraun! Andri Adolphsson með lúmskt skot naumlega framhjá.

Alfreð Elías, aðstoðarþjálfari ÍBV, ósáttur við spilamennsku síns liðs í fyrri hálfleik. Segir í viðtali á Stöð 2 Sport að margt megi betur fara hvað varðar sendingar og annað.

Valsmenn með verðskuldaða forystu í hálfleik. Eyjamenn hafa sáralítið náð að skapa sér. Það væri forvitnilegt að vera fluga á vegg í búningsklefa ÍBV í hálfleik.

Leikurinn róast talsvert. Eyjamenn að reyna að skapa sér færi en gengur illa að finna glufur á Valsvörninni.

Jæja þarna kom skot á markið frá ÍBV. Jón Ingason í teignum eftir langt innkast en skotið endar í öruggu fangi Antons Ara Einarssonar.

Simon Smidt með skot af löngu færi. Rosa hátt yfir. Fullmikil bjartsýni.

Pressan sem Valsmenn hafa verið með er að svínvirka og þeir eru ítrekað að koma Eyjamönnum í allskonar vandræði.

Valsmenn halda áfram að sækja. Þeir eru miklu miklu betri þessa stundina.

Darraðadans í vítateig ÍBV. Varnarmaður náði að kasta sér fyrir skot sem Kristinn Ingi átti.

Hafsteinn Briem tók við fyrirliðabandinu þegar Avni fór af velli.

HÖRKUFÆRI HJÁ ÍBV! Gunnar Heiðar skallar boltann framhjá! Anton Ari misreiknaði þennan bolta og var úr leik í markinu.

Sigurður Egill með sendingu inn í teig Eyjamanna. Kristinn Freyr teygir sig í knöttinn en nær ekki til hans. Erfiður bolti.

Eyjamenn töluvert meira með boltann hér á upphafsmínútum leiksins.

ÍBV fær aukaspyrnu. Skotfæri. Boltanum rennt á Mikkel Maigaard en hann skýtur í varnarvegg Valsmanna.

LEIKURINN ER HAFINN! Valur hóf leik. ÍBV sækir í átt að Laugardalslauginni.

Heiðursgestur er forsætisráðherra, Sigurður Ingi Jóhannsson. Hann er að heilsa upp á liðin, dómarana og lukkukrakkana.

Liðin ganga út á völlinn. Áður en leikar hefjast þá verður okkar ástkæri Þjóðsöngur spilaður.

Jæja fáum spekingana í fréttamannastúkunni til að spá: Magnús Már Einarsson, Fótbolta.net: Ég spái náttúrulega sigri Vals. 2-0. Tómas Þór Þórðarson, 365: 1-0 ÍBV. Það er Eyjaveður og það hjálpar þeim. Ingvi Þór Sæmundsson, 365: Vító. ÍBV vinnur. Derby hetjan. Hjörvar Ólafsson, Mbl: 2-1 sigur ÍBV.

Óli Jó er með 10/11 húfuna sína, sprotadómararnir eru farnir að hita upp, fyrir utan völlinn er verið að gefa pulsur og búið að blása upp hoppukastala. Það er innan við hálftími í þetta!

Það er létt rigning í Laugardalnum núna. Það er bara hressandi að fá blautan völl. Vonandi ávísun á skemmtilegri leik!

Byrjunarliðin eru klár Ekkert kemur á óvart í byrjunarliði Vals. Hjá ÍBV er miðjumaðurinn Sindri Snær Magnússon meiddur og spilar ekki. Avni Pepa fyrirliði er hinsvegar klár í slaginn. Bjarni heldur áfram að sýna hinum unga Felix Erni Friðrikssyni traustið og Jón Ingason er meðal varamanna.

Leiðin í Laugardal Eyjamenn unnu frækinn sigur á FH í undanúrslitum en áður höfðu þeir slegið m.a. út Breiðablik og ÍA. Valsmenn unnu í undanúrslitum sigur á Selfossi sem tryggði þeim sæti í úrslitaleik Borgunarbikarsins en bikarinn er á Hlíðarenda og þar vilja Valsmenn halda honum.

Eyjamenn dvöldu í nótt á Hótel Glymi í Hvalfirðinum. Báðir þjálfarar hafa breytt út af hefðbundinni dagskrá í aðdraganda leiksins enda um einn stærsta íþróttaviðburð ársins að ræða hér á landi!

Dómararnir búnir að taka göngutúr um völlinn hér í Laugardalnum. Líkt og í undanúrslitum eru sprotadómarar í dag. Þorvaldur Árnason er aðaldómari en hann var valinn besti dómari umferða 1-11 í Pepsi-deildinni. Dómari: Þorvaldur Árnason Aðstoðardómari 1: Gylfi Már Sigurðsson Aðstoðardómari 2: Birkir Sigurðarson Sprotadómari 1: Vilhjálmur Alvar Þórarinsson Sprotadómari 2: Gunnar Jarl Jónsson Varadómari: Þóroddur Hjaltalín

Bjarni Jóhannsson, þjálfari ÍBV: Maður finnur fyrir mikilli stemningu og hefur verið síðan við tryggðum okkur sæti í úrslitum. Eyjamenn vilja alltaf ná langt og vera bestir. Það er flott hugarfar. Vonandi náum við að skrifa nýja sögu á laugardaginn. Það er frábært fyrir mína leikmenn að vera komnir í Laugardalinn. Vonandi verða menn duglegir og kjarkaðir. Ég met sigurlíkurnar 50/50. Liðin eru á svipuðum stað í deildinni en Valsmenn eru núverandi bikarmeistarar og þeir hafa kannski örlítið fram yfir okkur. Það mun bara peppa okkur upp. Valsmenn eru fljótir að snúa vörn í sókn. Þeir eru með klóka spilara og nokkuð fljóta framlínu.

Ólafur Jóhannesson, þjálfari Vals: Bikarúrslitaleikur er stærsti leikur á landinu. Það er feykilega gaman að taka þátt í honum. Við höfum nálgast bikarkeppnina á góðan hátt, Það er bara eitt tækifæri í bikar og við höfum hamrað á því. Það hefur kveikt eitthvað í mönnum. Þessi lið eru svipuð að getu. Þetta eru tvö hörkulið og verður jafn og skemmtilegur leikur. Við verðum að vera andlega tilbúnir. Það er enginn meiddur hjá okkur, ekkert sem mun stoppa okkur á laugardaginn.

Lykilmenn: Valur: Kristinn Freyr Sigurðsson. Þessi hæfileikaríki leikmaður er potturinn og pannan í spilamennsku Valsliðsins. Er fastagestur í úrvalsliðum Pepsi-deildarinnar. ÍBV: Pablo Punyed. Algjör lykilmaður hjá Eyjamönnum. Þeir fengu Pablo fyrir tímabilið og hann var valinn maður leiksins þegar ÍBV vann Víking Ólafsvík í síðasta leik sínum.

Sagan... Valur hefur 10 sinnum orðið bikarmeistari eftir 13 úrslitaleik. ÍBV hefur 4 sinnum orðið bikarmeistari eftir 10 úrslitaleiki.

Hér verður bein textalýsing frá bikarúrslitaleik Vals og ÍBV í karlaflokki. Valsmenn eru ríkjandi bikarmeistarar en Eyjamenn lyftu síðast bikarnum 1998 eftir sigur gegn Leiftri. Þjálfari Eyjamanna þá var Bjarni Jóhannsson, sami maður og heldur um stjórnartaumana í dag!