SKÝRSLAN: Fjölnismenn fjarlægjast fallsvæðið
Hvað réði úrslitum?
Fjölnismenn refsuðu ÍBV í tvígang fyrir slæman varnarleik. Í fyrra markinu skoppaði boltinn í teignum eftir langt innkast og í því síðari opnaðist miðjan algjörlega fyrir Ingimund Níels sem þakkaði fyrir sig. Undir lok leiksins sóttu Eyjamenn stíft en varnarmúr Fjölnis hélt og Grafarvogsliðið landaði stigunum þremur þátt fyrir að hafa oft spilað betur.
Bestu leikmenn
1. Gunnar Heiðar Þorvaldsson (ÍBV)
Ekki oft sem maður leiksins kemur úr tapliði en Gunnar var mjög góður í dag. Skoraði markið og skilaði bolta vel frá sér.
2. Hans Viktor Guðmundsson (Fjölnir)
Hélt Eyjamönnum vel í skefjum lengst af í leiknum og hjálpaði Fjölni að standa af sér storminn í lok leiks.
Atvikið
Reynsluboltarnir Gunnar Már Guðmundsson og Ingimundur Níels Óskarsson spiluðu síðustu tuttugu mínúturnar og sá síðarnefndi skoraði sigurmarkið með laglegu skoti fyrir utan vítateig. Ingimundur fékk flugbraut upp að teignum og hann nýtti það vel.
Hvað þýða úrslitin?
Fjölnismenn eru komnir með 15 stig í 7. sæti, einungis viku eftir að þeir sátu í botnsætinu. Tveir sigrar í röð geta breytt öllu í þessari jöfnu Pepsi-deild. Fjölnir er nú fjórum stigum á undan ÍBV sem er í 11. sætinu með 11 stig.
Vondur dagur
Shahab Zahedi Tabar, frá Íran, lék sinn fyrsta leik í framlínu ÍBV. Hann gerði lítið á þeim 54 mínútum sem hann spilaði og sóknarleikur eyjamanna var mun betri eftir að hann fór af velli. Ekki góð frumraun. Derby Carillo fékk aftur sénsinn í marki ÍBV en fór meiddur af velli í fyrri hálfleik. Einnig vondur dagur fyrir hann.
Dómarinn - 7.5
Þórddur hefði átt að spjalda Gunnar Má eftir læti í síðari hálfleiknum. Annars fín frammistaða í leik sem var frekar þægilegt að dæma.