SKÝRSLAN: Gjafmildir Selfyssingar engin fyrirstaða fyrir Íslandsmeistarana
Hvað réði úrslitum?
Blikar komust yfir snemma í leiknum sem að gerði þeim klárlega auðveldara fyrir. Í leiknum sást klár gæðamunur á liðunum tveimur þó svo að mörkin sem að Selfyssingar gáfu hafi verið ansi ódýr. Blikarnir gerðu nákvæmlega það sem að þær þurftu að gera og sigurinn var aldrei í hættu.
Bestu leikmenn
1. Berglind Björg Þorvaldsdóttir
Berglind Björg skoraði mark og lagði upp annað í leiknum í kvöld. Fékk nokkur fín færi og hefði auðveldlega getað skorað að minnsta kosti eitt mark í viðbót. Alltaf hættuleg þegar boltinn er nálægt henni.
2. Hildur Antonssdóttir
Algjör baráttuhundur á miðjunni. Vann gífurlega marga bolta fyrir Blika og leikmenn Selfyssinga réðu lítið sem ekkert við hana. Kórónaði síðan frábæra frammistöðu sína með marki.
Atvikið
Ekki mikið af risa atvikum í leiknum. Vítaspyrnan sem að Agla María skoraði úr á 82. mínútu fær þennan titil. Kláraði leikinn endanlega fyrir gestina úr Kópavogi.
Hvað þýða úrslitin?
Úrslitin þýða einfaldlega það að Blikar eru komnir í toppsæti deildarinnar með fullt hús stiga. Selfyssingar hinsvegar án stiga eftir fyrstu tvær umferðirnar.
Vondur dagur
Varnarleikur Selfyssinga var ansi dapur í leiknum og liðið gaf mörk sem að auðveldlega er hægt að koma í veg fyrir. Brynja Valgeirsdóttir, þessi frábæri varnarmaður Selfyssinga, hefur oft spilað betur en hún gerði slæm mistök í öðru marki Blika ásamt því að fá dæmda á sig vítaspyrnu undir lok leiksins.
Dómarinn - 8,5
Alfreð Elías Jóhannsson, þjálfari Selfyssinga, er líklega ekki sammála mér enda talaði hann við hana í dágóða stund eftir leikinn. Fannst Bríet hafa flott tök á leiknum, hélt línu og var með stóru ákvarðanirnar hárréttar.