FH vinnur þægilegan sigur á Fylki 2-0.

Var alltaf brekka fyrir Fylki eftir að þeir misstu mann af velli.

Baldur Logi með lúmska tilraun en framhjá markinu fór það.

+3
Fáum þrjár mínútur í uppbót

FH er að sigla þessu þægilega heim.

Þrátt fyrir að vera manni færri verður að hrósa Fylki fyrir þeirra baráttu í þessum leik.

Steven Lennon með flotta pressu fremst á vellinum fyrir FH.

Þórður Gunnar keyrir á Hörð Inga sem hendir sér í tæklingu innan teigs en Erlendur metur það sem svo að það hafi bara verið boltinn við vægast sagt litla hrifningu Fylkismanna.

Þórir Jóhann tíar upp Björn Daníel sem á hörku skot sem Ólafur ver frábærlega í horn.

Þórir Jóhann með hörkuskot sem Orri Sveinn hendir sér fyrir.

Ágúst Hlyns í flottu færi en skotið beint á Ólaf í marki Fylkis.

Matti Villa með skalla yfir. Fékk flottan bolta frá Herði Inga en skallinn yfir markið.

Ágúst Hlyns á tæklingu á Arnóri Borg sem kveikir hressilega í stúkunni en Erlendur mat það sem svo að Ágúst hafi farið í boltann og dæmir ekki.

Það eru FH sem stýra ferðinni í þessum leik.

Seinni hálfleikur farinn af stað. Engar skiptingar í hálfleik sýnist mér.

+2
Elli Eiríks flautar til loka fyrri hálfleiks.
Fylkismenn í stúkunni eru allt annað en sáttir með fyrri hálfleikinn og púa dómarann af velli.

Siglum inn í uppbótartíma í fyrri hálfleik.

Steven Lennon í fínu skotfæri en skotið er hátt yfir.

Eggert Gunnþór sendur útaf að hlúa að sári á fæti, sýndist þetta vera hnéð.

Arnór Borg og Djair búnir að skipta um kannt hjá Fylki.
Arnór er núna vinstra megin og Djair hægra megin.

FH búið að þrýsta aðeins framar eftir markið.

VÍTI!!
FH fær vítaspyrnu! Ólafur Kristófer dæmdur brotlegur í samskiptum sínum við Jónatan Inga.
Fylkismenn æfir í stúkunni en ég gat ekki séð annað en það hafi verið snerting þarna.

Steven Lennon kemur Ágústi Hlyns í góða fyrirgjafastöðu en Fylkismenn bjarga rétt áður en Matti Villa nær að koma nánnum í boltann.

Lítið í gangi þessa stundina.

Fylkismenn fá fyrstu hornspyrnu leiksins. Arnór Borg með flottan sprett upp hægri sem endar í hornspyrnu.

Orri Hrafn með bjartsýnistilraun af löngu færi en boltinn vel framhjá.

FH kærulausir aftast og Djair ekki langt frá því að ná að pota sér einum í gegn en Gunnar Nielsen vel á verði og kemur og hreinsar boltann frá.

FH pressar lið Fylkis vel þessar fyrstu mínútur.

Það eru FH sem byrja þennan leik. Þórir Jóhann á upphafssparkið.

Liðin ganga út á völl, þetta er að bresta á!

Byrjunarliðin eru klár og má sjá hér til hliðar en það er líka hægt að smella á fréttina hér.

Það er málarinn Erlendur Eiríksson sem sér um flautuleikinn í kvöld en honum til aðstoðar verða þeir Oddur Helgi Guðmundsson og Gunnar Helgason.
Aðalbjörn Heiðar Þorsteinsson verður til taks ef eitthvað kemur uppá hjá tríóinu í kvöld og þá mun Frosti Viðar Gunnarsson hafa eftirlit með leiknum.

Fylkir og FH tóku sitthvoran sigurinn í viðreign þessara liða síðasta sumar en báðir leikir liðanna enduðu með sigri gestanna.

Fylkir sigraði FH í Kaplakrika 1-2 en Þórður Gunnar Hafþórsson kom Fylki yfir í fyrri hálfleik áður en Daníel Hafsteinsson jafnaði metin fyrir FH. Það var Arnór Borg Guðjohnsen sem skoraði sigurmark Fylkis.

FH vann leik þessara liða á Wurth vellinum í fyrra 1-4 en í þeim leik skoruðu Björn Daníel Sverrisson tvö mörk fyrir FH, Ólafur Karl Finsen eitt og þá varð Ragnar Bragi Sveinsson fyrir því óláni að skora sjálfsmark.
Mark Fylkis í leiknum skoraði Arnór Gauti Ragnarsson

Ég fékk þá félaga í Steve Dagskrá til þess að spá fyrir um þennan leik en þeir spá FH-ingum öruggum sigri.

Þetta verður erfiður dagur a skrifstofu Fylkismanna því FH mun vinna statement 3-0 sigur í kvöld. Matti Villa mætir inn með sína zero tolerance nærveru og setur 2. Jónatan skorar síðan sturlað mark í lok leiks.

Hjörvar Hafliðason, þáttarstjórnandi Dr. Football hlaðvarpsins og yfirmaður íþróttamála hjá ViaPlay, spáir í fyrstu umferðina.

Fylkir 1 - 3 FH
Matti Vill stimplar sig inn með tveimur mörkum.

Við skulum taka stutta yfirferð yfir sögu liðina svona rétt fyrir fyrsta leik á Íslandsmótinu 2021.

Fylkir
- Fylkir er stofnað 28.05.1967
- Besti árangur í efstu deild er 2.sætið en Fylkir hafa tvívegis lokið keppni í 2.sæti Íslandsmótsins en það gerðist árin 2000 og 2002.
- Albert Brynjar Ingason er markahæsti leikmaður Fylkis í sögu efstu deildar með 56 mörk og þá er Andrés Már Jóhannesson leikjahæstur í sögu Fylkis í efstu deild með 191 leik að baki.
- Fylkir hafa leikið 458 leiki í efstu deild, sigrað 172, gert 95 jafntefli og tapað 191 leik. sem samsvarar 611 stigum sem Fylkir hafa unnið sér inn í efstu deild.


FH
- FH er stofnað 15.10.1929
- Besti árangur í efstu deild eru 8 Íslandsmeistaratitlar: 2004,2005, 2006, 2008, 2009, 2012, 2015 og 2016.
- Atli Viðar Björnsson á flest mörk fyrir FH í sögu efstu deildar eða 113 talsins og þá á nafni hans, Atli Guðnason flesta leiki fyrir FH í sögu efstu deildar eða 285 leiki.
- FH hafa leikið samtals 690 leiki í efstu deild, unnið 327, gert 160 jafntefli og tapað 203 leikjum sem samsvarar 1141 stigum sem FH hafa unnið sér inn í efstu deild.

Lið FH er spáð 3.sæti deildarinnar af okkar spekingum á fotbolti.net.

Það er ljóst að það hafa stórir póstar yfirgefið FH liðið en á sama tíma hafa FH-ingar styrkt liðið sitt fyrir komandi átök og má þar einna helst nefna Matthías Vilhjálmsson sem snýr aftur í Hafnarfjörðinn eftir 10 ár í atvinnumennsku.

Komnir
Ágúst Eðvald Hlynsson frá Horsens á láni (til 1. júlí)
Matthías Vilhjálmsson frá Valerenga
Oliver Heiðarsson frá Þrótti R.
Teitur Magnússon frá OB
Vuk Oskar Dimitrijevic frá Leikni R.

Farnir
Atli Guðnason hættur
Baldur Sigurðsson í Fjölni
Brynjar Ásgeir Guðmundsson í ÍH
Daníel Hafsteinsson í KA
Egill Darri Makan Þorvaldsson í Kórdrengi
Kristján Gauti Emilsson
Logi Tómasson í Víking R. (Var á láni)
Ólafur Karl Finsen í Stjörnuna
Þórður Þorsteinn Þórðarson í ÍA

Aðstoðarþjálfarinn segir - Davíð Þór Viðarsson
Mér finnst þetta vera eðlileg spá. Það er fullt af góðum liðum og Val og Breiðabliki er spáð fyrir ofan okkur. Miðað við undirbúningstímabilið er ekkert óeðilegt við það. Það er sama markmið hjá FH og hefur verið frá árinu 2004. Það er að berjast á toppnum og berjast um allt það sem er í boði. Það er engin breyting á því sem betur fer. Við erum mjög ánægðir með hópinn. Ef eitthvað býðst sem okkur líst mjög vel á þá munum við skoða það en við erum ekki á höttunum á eftir neinum frekari liðsstyrk. Við erum mjög sáttir með þennan hóp sem við erum með og treystum honum 100% til að gera góða hluti í þessari deild.

Byrjum á að renna yfir lið Fylkis.

Við hjá fotbolti.net spáum liði Fylkis 8.sæti deildarinnar.

Það er ljóst að talsverðar breytingar verða á liði Fylkis í ár en þeir hafa misst nokkra lykilmenn frá sér en á samta tíma eru spennandi leikmenn að koma inn sem verður skemmtilegt að fylgast með í sumar.

Komnir
Dagur Dan Þórhallsson frá Mjöndalen
Jordan Brown frá Þýskalandi
Orri Hrafn Kjartansson frá Heerenveen
Torfi Tímóteus Gunnarsson frá Fjölni
Unnar Steinn Ingvarsson frá Fram

Farnir
Andrés Már Jóhannesson hættur
Arnar Darri Pétursson í Stjörnuna
Arnar Sveinn Geirsson í Breiðablik (Var á láni)
Hákon Ingi Jónsson í ÍA
Ólafur Ingi Skúlason hættur
Sam Hewson í Þrótt R.
Valdimar Þór Ingimundarson til Stromsgödset

Þjálfarinn segir - Atli Sveinn Þórarinsson
Mér lýst vel á þetta, þetta er bara geggjuð spá! Ég öfunda ykkur alls ekki af því að þurfa að raða liðunum niður því þetta verður rosalega jöfn deild. Mér finnst þessi spá skiljanleg, við erum svolítið óskrifað blað. Við höfum misst sterka pósta og fengið nýja menn inn í staðinn. Það verður mikilvægt fyrir liðin að reyna að ná inn góðu starti því það gæti stuðlað að allt öðruvísi tímabili. Í Árbænum er mikil spenna fyrir mótinu og gott að vera með þennan fasta leikdag fyrir framan sig, leikur gegn FH í fyrstu umferð. Nú er bara að krossa fingur og vona að það haldi. Svo vonar maður innilega að áhorfendur fái að mæta því þeirra hefur verið sárt saknað.

Þegar Íslandsmótinu 2020 var slaufað síðastliðið haust höfðu bæði þessi lið leikið 18 leiki.

Heimamenn í Fylki enduðu mótið í hörkuspennandi Evrópubaráttu en þegar mótinu var slaufað sátu þeir í 6.sæti deildarinnar, 3 stigum á eftir 3.sætinu og 12 stig eftir í pottinum til þess að keyra á Evrópudrauminn.

FH endaði mótið í 2.sæti deildarinnar með 36 stig og átti tölfræðilega möguleika á Íslandsmeistaratitlinum en þrátt fyrir það virtist fátt ætla stoppa Íslandsmeitara Vals.

Komið margblessuð og sæl og verið hjartanlega velkominn í þráðbeina textalýsingu frá leik Fylkis og FH í fyrstu umferð Pepsi Max deild karla 2021.
Þessi veisla er svo sannarlega byrjuð!