Spá Fótbolta.net - 3. sæti: FH

Spáin:
1. ?
2. ?
3. FH 98 stig
4. KR 91 stig
5. KA 78 stig
6. Stjarnan 69 stig
7. Víkingur 57 stig
8. Fylkir 56 stig
9. HK 40 stig
10. Keflavík 28 stig
11. ÍA 23 stig
12. Leiknir 14 stig

Um liðið: FH-ingar enduðu í 2. sæti Pepsi Max-deildarinnar í fyrra en náðu þó ekki að veita Valsmönnum harða keppni um Íslandsmeistaratitilinn. Góðar framfarir voru þó hjá FH á milli ára. Þjálfarateymið hefur breyst talsvert undanfarið árið. Eiður Smári Guðjohnsen og Logi Ólafsson tóku við þegar Ólafur Kristjánsson fór til Esbjerg í fyrra. Eiður hætti síðan í desember þegar hann tók við starfi aðstoðarþjálfara hjá íslenska landsliðinu.



Þjálfari - Logi Ólafsson: Það eru fáir þjálfarar sem búa yfir jafn mikilli reynslu og Logi Ólafsson. Logi tók við FH um mitt sumar í fyrra ásamt Eiði Smára og saman gerðu þeir góða hluti með liðið. Logi hefur unnið titla á Íslandi og þjálfað íslenska landsliðið. Davíð Þór Viðarsson, fyrrum fyrirliði FH, er honum til aðstoðar.

Styrkleikar: Gríðarleg reynsla er í liði FH og margir leikmanna liðsins hafa spilað í atvinnumennsku erlendis. Í kringum þá eru einnig ungir og spennandi leikmenn og breiddin í hópnum er góð. Matthías Vilhjálmsson kemur með mikið sigurhugarfar og sóknarlínan er ógnvænleg með hann og Steven Lennon í broddi fylkingar. Í sóknarlínunni eru einnig mörg önnur vopn.

Veikleikar: Gengi FH á undirbúningstímabilinu hefur verið upp og ofan og liðið hefur ekki náð almennlegum takti. 6-1 tap gegn Víkingi R. í Lengjubikarnum er á meðal úrslita vetrarins. Varnarleikurinn hefur ekki verið nægilega öflugur og FH þarf að ná betri tökum á honum til að blanda sér í titilbaráttuna af fullum þunga.

Lykilmenn: Steven Lennon og Eggert Gunnþór Jónsson. Lennon var á góðri leið með að slá markametið í Pepsi Max-deildinni í fyrra áður en mótið var flautað af þegar fjórar umferðir voru eftir. Skotinn verður bara betri með aldrlnum. Eggert Gunnþór kom til FH um mitt sumar í fyrra og setti strax mark sitt á miðjuna hjá liðinu. Algjört akkeri í liðinu.

Fantabrögð mæla með í Draumaliðsdeild Eyjabita:
Steven Lennon er augljósi kosturinn en hann kostar 12 m. Jónatan Ingi og Þórir Jóhann skiluðu svipað mörgum stigum í fyrra hlutfallslega miðað við verð. Svo value-ið gæti verið jafn mikið í þeim. Svo er áhugavert að sjá hvernig Matti Villa nær að standa undir 11 m verðinu sínu. Við ætlum að fjárfesta annars staðar í okkar liðum og tökum Jónatan Inga á 6,5.
Smelltu hér til að fara í Draumaliðsdeild Eyjabita

Hlaðvarpsþátturinn Ungstirnin mælir með:
Þórir Jóhann Helgason er fjölhæfur miðjumaður sem kom í gegnum unglingastarf Hauka en gekk til liðs við FH árið 2018. Eftir eitt ár hjá FH byrjaði Þórir að brjótast inn í liðið en hann spilaði 16 leiki 2019 en árið 2020 byrjaði Þórir 16 leiki og skilaði 2 mörkum og 6 stoðsendingum í flottu liði FH sem endaði í 2. sæti. Þess má einnig geta að Þórir var hluti af U-21 liði Íslands sem var á EM og er þetta einn af ungum leikmönnum deildarinnar sem gæti farið í atvinnumennsku eftir tímabil.

Spurningarnar: Nær þjálfarateymið sama gír í liðið og síðari hlutann á síðasta tímabili? Verður varnarleikurinn til vandræða? Mun reynslan vega þungt í titilbaráttunni?

Völlurinn: Kaplakrikavöllur er einn glæsilegasti grasvöllur landsins. Stemningin í stúkunni er oft góð og fyrir leiki geta menn gírað sig upp með veitingum á pallinum. Skemmtilegur völlur til að heimsækja.



„Sama markmið hjá FH og hefur verið frá árinu 2004"

Aðstoðarþjálfarinn segir - Davíð Þór Viðarsson
„Mér finnst þetta vera eðlileg spá. Það er fullt af góðum liðum og Val og Breiðabliki er spáð fyrir ofan okkur. Miðað við undirbúningstímabilið er ekkert óeðilegt við það. Það er sama markmið hjá FH og hefur verið frá árinu 2004. Það er að berjast á toppnum og berjast um allt það sem er í boði. Það er engin breyting á því sem betur fer. Við erum mjög ánægðir með hópinn. Ef eitthvað býðst sem okkur líst mjög vel á þá munum við skoða það en við erum ekki á höttunum á eftir neinum frekari liðsstyrk. Við erum mjög sáttir með þennan hóp sem við erum með og treystum honum 100% til að gera góða hluti í þessari deild."

Komnir
Ágúst Eðvald Hlynsson frá Horsens á láni (til 1. júlí)
Matthías Vilhjálmsson frá Valerenga
Oliver Heiðarsson frá Þrótti R.
Teitur Magnússon frá OB
Vuk Oskar Dimitrijevic frá Leikni R.

Farnir
Atli Guðnason hættur
Baldur Sigurðsson í Fjölni
Brynjar Ásgeir Guðmundsson í ÍH
Daníel Hafsteinsson í KA
Egill Darri Makan Þorvaldsson í Kórdrengi
Kristján Gauti Emilsson
Logi Tómasson í Víking R. (Var á láni)
Ólafur Karl Finsen í Stjörnuna
Þórður Þorsteinn Þórðarson í ÍA

Fyrstu fimm leikir FH:
1. maí Fylkir - FH
9. maí FH - Valur
13. maí FH - ÍA
17. maí HK - FH
22. maí FH - KR

Sjá einnig:
Hin hliðin - Oliver Heiðarsson
Hin hliðin - Hjörtur Logi Valgarðsson

Leikmenn FH:
1 Gunnar Nielsen
2 Hörður Ingi Gunnarsson
4 Pétur Viðarsson
5 Hjörtur Logi Valgarðsson
6 Eggert Gunnþór Jónsson
7 Steven Lennon
8 Þórir Jóhann Helgason
9 Matthías Vilhjálmsson
10 Björn Daníel Sverrisson
11 Jónatan Ingi Jónsson
14 Morten Beck Andersen
16 Guðmundur Kristjánsson
17 Baldur Logi Guðlaugsson
21 Guðmann Þórisson
22 Oliver Heiðarsson
24 Daði Arnarsson
25 Einar Örn Harðarsson
26 William Cole Campbell
27 Jóhann Ægir Arnarsson
28 Teitur Magnússon
29 Vuk Oskar Dimitrijevic
30 Dagur Þór Hafþórsson
33 Úlfur Ágúst Björnsson
34 Logi Hrafn Róbertsson
35 Óskar Atli Magnússon

Spámennirnir: Arnar Daði Arnarsson, Elvar Geir Magnússon, Guðmundur Aðalsteinn Ásgeirsson, Gunnar Birgsson, Hafliði Breiðfjörð, Ingólfur Sigurðsson, Magnús Már Einarsson, Sverrir Einarsson, Sæbjörn Þór Þórbergsson Steinke, Tómas Þór Þórðarson