Frábær sigur KAmanna staðreynd og það mjög sanngjarnt. Keflvíkingar sáu ekki til sólar stærstan hluta leiks og þurfa að horfa á innávið og laga það sem er að eftir að hafa fengið 4 mörk á sig annan leikinn í röð.

Skýrsla og viðtöl síðar í kvöld.

Nökkvi Þeyr með boltann og keyrir að marki. Nær skotinu en tiltölulega beint á Sindra sem hefur verið skástur heimamanna í kvöld.

Davíð brýtur á Hallgrími á miðjum vellinum. Grímsi étur nokkrar sekúndur af klukkunni eins og vera ber.

Sindri Þór reynir skot með vinstri af talsverðu færi, alltaf á uppleið og siglir yfir markið.

Dagur Ingi gerir vel og kemst inn á teiginn vinstra meginn. Nær skotinu en Stubbur mættur og ver vel, heldur boltanum að auki.

Fyrirgjöf Rúnars af varnarmanni og afturfyrir. Eru aðeins að hressast en er það of seint?

Rúnar Þór fer niður í teignum og einhverjir kalla eftir vítaspyrnu. Jóhann segir nei og hefur hárrétt fyrir sér. Rúnar á mikilli ferð og hélt einfaldlega ekki jafnvæginu er hann teygði sig til boltans.

Gibbs fær boltann í teignum en Þorri Mar vinnur vel til baka og kemur boltanum afturfyrir.

Hvað gerist hér? Þorri Mar hendir sér niður eftir viðskipti við Frans. Virðist þó ekkert vera í þessu og hann er fljótur á fætur.

Drífur ekki yfir fyrsta mann og ekki annar sénsinn heldur er boltinn berst aftur út á Davíð Snæ.

Fá þó horn hér.

Fátt sem bendir til þess að Keflavík sé að fara vinna sig aftur inn í þennan leik. Eru að klikka á einföldum sendingum trekk í trekk og vantar allan ákafa í þeirra sóknarleik.

Aukaspyrna frá Keflavík tekinn inn á teiginn en beint í hendur Steinþórs.

KA fær horn.

Boltinn dettur niður í teignum eftir hornið en Rodri skóflar boltanum vel yfir af vítateig.

Gestirnir fá horn.

Adam með skalla að marki eftir fyrirgjöf frá Rúnari en boltinn vel yfir.

Liggur aðeins á KA þessa stundina og heimamenn líklegri.

Stubbur í skógarhlaupi og missir boltann beint á Gibbs sem reynir að fara framhjá honum en Stubbur bjargar sér á ævintýralegan hátt. Stálheppinn engu að síður.

Kian með lúmskt skot að marki en Stubbur vel vakandi og á ekki í nokkrum vandræðum með það.

Höfum átt í smá tæknilegum erfiðleikum hér frá lokum fyrri hálfleiks sem búið er að leysa úr.

Keflavík byrjað seinni hálfleik ágætlega. Adam að vinna sig í færi en nær ekki að setja boltann á markið.

Seinni hálfleikur farinn af stað. Keflvíkingar geta þakkað Sindra markverði sínum að vera ennþá inn í leiknum en þurfa að bæta í.

KA leiðir 1-2 í hálfleik. Mikilvæg varsla hjá Sindra á markamínútunni.

KA fær vítaspyrnu!!!!!!

Kæruleysi í vörn KA en Rúnar Þór missir boltann afturfyrir eftir að hafa unnið boltann í teig KA.

Rúnar Þór með skot að marki en hátt yfir.

Þorri Mar fer illa með Rúnar í vörn Keflavíkur en heimamenn koma boltanum frá nánast af tánum á Daníel Hafsteins er hann býr sig undir að skjóta í teignum.

Gestirnir sækja hornspyrnu eftir snarpa skyndisókn.

Verður að segjast að þótt færin hafi heldur látið standa á sér hafa gestirnir frá Akureyri verið mun betri hér framan af. Sóknarleikur Keflvíkinga verið helst til tilviljanakenndur og ómarkviss.

Frans með boltann í fínu skotfæri fyrir utan teig en skot hans í varnarmann og þaðan í fang Steinþórs í markinu.

Keflavík fær hornspyrnu eftir langt innkast Rúnars. Davíð spyrnir inn.

Sending úr djúpinu inn á teig KA. Stubbur með þetta allt á hreinu.

Rúnar Þór brýtur á Hallgrími í góðri fyrirgjafarstöðu. Stóru mennirnir mættir í teiginn.

Gestirnir haldið boltanum hér í byrjun og verið ákveðnari. Engin færi þó litið dagsins ljós.

Steinþór finnur Ásgeir í hlaupi inn í teiginn en Magnús Þór kemst fyrir og boltinn afturfyrir. Hornspyrna.

Þetta er farið af stað í hér í Keflavík það eru gestirnir sem hefja hér leik og sækja í átt að sýslumannshúsinu.

Allt að verða til reiðu hér á HS-Orkuvellinum og liðin gengin til búningsherbergja til lokaundirbúnings. Vonumst að sjálfsögðu eftir fjörugum og spennandi leik.

Heimamenn í Keflavík gera tvær breytingar á liði sínu frá tapinu gegn Blikum í síðustu umferð. Nacho Heras glímir við smávægileg meiðsli og er því ekki í hóp í dag. Þá fær Ari Steinn Guðmundsson sér sæti á bekknum en inn í þeirra stað koma þeir Magnús Þór Magnússon og Adam Árni Róbertsson

Gestirnir gera eina breytingu frá 3-0 sigrinum á Leikni á dögunum Rodrigo Mateo hefur jafnað sig af meiðslum og kemur inn í liðið á kostnað Nökkva Þeys Þórssonar sem fær sér sæti á bekknum.

Tveimur leikjum er þegar lokið í umferðinni.
Leiknir vann frábæran 3-0 sigur á Fylki á Domusnovavellinum en lýsingu Antons Freys Jónssonar auk skýrslu og viðtala má finna HÉR

Þá vann Víkingur ekki síðri 3-0 sigur gegn liði Breiðabliks á sama tíma en viðtöl, lýsingu og skýrslu Arnars Laufdal má lesa HÉR

Spámaðurinn

Kjartan Atli Kjartansson er þáttarstjórnandi í Pepsi Max stúkunni á Stöð 2 Sport. Hann er spámaður fyrir 4. umferð deildarinnar sem hófst á sunnudag og lýkur í dag.

Keflavík 1 - 2 KA
Í gegnum tíðina hef ég ekki séð neitt lið oftar en Keflavík, ég verð enn ,,starstruck'' þegar ég hitti leikmenn liðsins frá tíunda áratug síðustu aldar. Maður var spenntur að sjá liðið í Pepsi Max deildinni og hafa Keflvíkingar verið sprækir. KA er þó ólseigt lið og ég held að Akureyringarnir haldi sigurgöngu sinni áfram og leggi Keflvíkinga 1-2 með marki í blálokin.

Meiðslalistinn

KA menn hafa byrjað mótið vel líkt og áður sagði en meiðslalisti þeirra fyrir leikinn er þó ansi langur. Kristijan Jajalo, Ívar Örn Árnason, Hallgrímur Jónasson, Hrannar Björn Steingrímsson, Jonathan Hendrickx, Ýmir Már Geirsson, Rodrigo Gomes Mateo, Sebastiaan Brebels og Sveinn Margeir Hauksson eru allir frá vegna meiðsla eða tæpir en mögleiki er þó á að Rodri verði með í kvöld.



Hvað Keflavík varðar er næsta víst að Marley Blair verði ekki með þeim í kvöld og þá er Nacho Heras tæpur og líklegt að hann verði hvíldur.

Keflavík

Tvö útvallartöp og einn heimasigur er uppskera heimamanna í Keflavík eftir þrjár umferðir.Mótið hófst með 1-0 tapi gegn Víkingum, Frábær 2-0 heimasigur á lánlausum Stjörnumönnum vannst í annari umferð en Keflvíkingum var kippt hressilega niður á jörðina í 4-0 tapi gegn Breiðablik á dögunum.

Ástbjörn Þórðarson átti frábæran leik í sigrinum gegn Stjörnunni en mátti sín lítils gegn Breiðablik líkt og aðrir leikmenn Keflavíkur. Þá bíða menn enn eftir því að Joey Gibbs reimi á sig markaskónna en munurinn á milli Lengjudeildarinnar og Pepsi Max sést bersýnilega á því að hann hefur varla fengið færi það sem af er sumri.

KA

KA liðið hefur farið afskaplega vel af stað þetta sumarið. Eftir 0-0 jafntefli gegn HK í fyrstu umferð bjuggust eflaust margir við því að jafntefliskóngar síðasta tímabils þar sem þeir gerðu 12 jafntefli í 18 leikjum myndu halda því áfram. Tónn manna um KA breyttist þó ögn eftir frábæran 1-3 útisigur gegn KR sem var svo fylgt eftir með 3-0 sigri á Leikni á Dalvík.

Hallgrímur Mar Steingrímsson hefur verið frábær í upphafi en sú stjarna sem skinið hefur hvað skærast verður að teljast Steinþór Már Auðunsson betur þekktur sem Stubbur. Markvörðurinn sem skipti aftur yfir til KA í vetur hefur eflaust ekki búist við því sjálfur að vera fara að spila mikið í sumar en þegar Jajalo aðalmarkvörður KA varð fyrir því óláni að handleggsbrotna rétt fyrir mót var Stubbur kallaður til og óhætt er að segja að hann hafi nýtt tækifærið vel.

Heil og sæl lesendur góðir og verið hjartanlega velkomin í beina textalýsingu Fótbolta.net frá leik Keflavíkur og KA í 4.umferð Pepsi Max deildarinnar.