SKÝRSLAN: Yfirburðir Blika gegn andlausu FH liði
Hvað réði úrslitum?
Er ekki viss hvort Blikarnir voru svona rosalega góðir eða FH svona rosalega slakir en bara sitt lítið af hverju! Blikar voru mjög léttleikandi og uppspilið gekk vel en öfugt hjá FH, Blikarnir líka fóru virkilega vel með færin sín í kvöld annað en gegn Val í seinasta leik.
Bestu leikmenn
1. Davíð Ingvarsson
Var gjörsamlega frábær í vinstri bakverðinum í dag og var líklega hættulegasti maður Blika á vellinum í dag, hljóp eins og óður maður og á stoðsendingu á Jason í öðru markinu og hefði getað lagt upp 2 mörk til viðbótar, heldur markinu hreinu og var með allt á hreinu í þessum leik.
2. Árni Vilhjálmsson
Leggur upp fyrsta markið á Kidda Steindórs og skorar svo úr víti þar sem hann gerir út um leikinn í stöðunni 4-0 og var virkilega öflugur í öllum sínum aðgerðum í kvöld.
Atvikið
Annað mark Blika sem Jason Daði skorar, mér fannst FH nánast gefast upp eftir það og þá varð þetta auðvelt fyrir Blikana og sigurinn aldrei í hættu.
Hvað þýða úrslitin?
Blikar fara í 4. sæti deildarinnar með 16 stig en FH-ingar sitja í því 6. með aðeins 11 stig og hafa ekki unnið leik í síðustu 5 leikjum.
Vondur dagur
Hægt að velja rosalega marga en Steven Lennon var hvergi sjáanlegur í leiknum í kvöld og náði aldrei að koma sér inn í leikinn, náði ekki að koma sér í færi né skapa neitt fyrir liðsfélaga sína.
Dómarinn - 9
Vilhjálmur Alvar frábær í kvöld, var með frábær tök á leiknum og dæmdi réttilega víti á FH-inga, Villi virðist vera alltaf flottur þegar undirritaður textalýsir leik hjá honum.