SKÝRSLAN: Framarar höfðu betur í baráttunni um Úlfarsfellið
Hvað réði úrslitum?
Í fljótu bragði mætti segja að sjálfstraust Framara hafi skilað þeim sigrinum í kvöld. Afturelding lék lengstum fínan fótbolta og fékk marktækifæri í fyrri hálfleik í stöðunni 0-0. Þéttur varnarleikur Fram í seinni hálfleik gaf hinsvegar Aftureldingu engin færi til að koma sér inn í leikinn.
Bestu leikmenn
1. Óskar Jónsson
Virkilega öflugur í liði Fram í kvöld. Kom liðinu á bragðið með marki í fyrri hálfleik. Barðist eins og ljón og gaf ekkert eftir í varnarvinnunni.
2. Kyle McLagan
Líkt og Óskar og fleiri leikmenn Fram þá átti Kyle góðan leik varnarlega sem gerði það að verkum að Afturelding átti í erfiðleikum með að skora í leiknum.
Atvikið
Á 33. mínútu fékk Anton Logi mjög gott tækifæri til að koma Aftureldingu yfir í leiknum en á þessum tímapunkti voru heimamenn virkilega líklegir til að skora mark. Tveimur mínútum síðar komust Fram hinsvegar yfir með skoti Óskars Jónssonar sem átti viðkomu í varnarmann Aftureldingar. Dýrt fyrir heimamenn.
Hvað þýða úrslitin?
Fram eru nú 12 stigum frá 3. sætinu á toppi deildarinnar og ekkert bendir til annars en að Fram leiki í Pepsi Max-deildinni á næsta ári. Afturelding er í 9. sæti deildarinnar með 13 stig, sex stigum frá fallsæti.
Vondur dagur
Danny Guthrie þurfti að fara af velli á 20. mínútu en hann fékk tak aftan í lærið. Það gæti þýtt að hann verði frá í einhvern tíma. Jákvætt hinsvegar að Framliðið hefur mikla breidd og virðast ekki eiga í miklum erfiðleikum með að rótera liðinu.
Dómarinn - 8
Flottur.