SKÝRSLAN: Hafnarfjörður er í alls konar litum eftir senur á lokamínútunum
Hvað réði úrslitum?
FH-liðið var sterkara heilt yfir en Haukar gáfust aldrei upp, og það skilaði þeim stigi. Eftir fast leikatriði í lokin jöfnuðu Haukar og Hafnarfjörður er því rauður, hvítur og svartur.
Bestu leikmenn
1. Elín Björg Norðfjörð Símonardóttir (FH)
Spilaði bara klukkutíma en það var mikil orka í henni og hún reyndist sínum gömlu liðsfélögum mjög erfið. Hún var einhvern veginn alltaf þar sem boltinn var í sóknarleiknum og gríðarlega sterk inn á vellinum. Skoraði mark FH, þó mörkin hefðu getað verið fleiri hjá henni.
2. Hildur Karítas Gunnarsdóttir (Haukar)
Var góð í að tengja spilið þegar tækifæri gafst, og grjóthörð þarna fremst á vellinum. Ég hélt hún væri að fara út af miðbik seinni hálfleiks en hún harkaði af sér og bjargaði stiginu.
Atvikið
Það kemur ekkert annað til greina; það er þetta jöfnunarmark á lokasekúndum leiksins. Þvílík dramatík!
Hvað þýða úrslitin?
Þau þýða það að FH er í öðru sæti með 21 stig, einu stigi frá toppnum. Haukar eru í fjórða sæti með átta stigum minna en FH. Kannski gefur þetta dramatíska jöfnunarmark þeim byr undir báða vængi.
Vondur dagur
Það er erfitt að skrá þetta á einhvern. Ég ætla að setja þetta á Kristínu Fjólu, miðjumann Hauka. Hún hefði getað komið þeim í 1-0 en setti boltann fram hjá markinu þegar hún ein á móti marki. Það var af 30 metrum en samt verður maður að gera kröfu á að skora í svona færi.
Dómarinn - 8
Fór ekki mikið fyrir honum og þannig viljum við hafa það. Virkilega vel dæmdur leikur.