SKÝRSLAN: Áður styrkleiki Víkings orðið að akkilesarhæl liðsins
Hvað réði úrslitum?
Víkingur gat ekki klárað dekkningu í föstu leikatriði undir lokin og Rodri fann pláss í teignum, fékk boltann frá Grímsa og jafnaði. Víkingur var betra liðið heilt yfir en náði ekki að klára leikinn á fyrsta klukkutímanum og bauð upp á jöfnunarmark frá KA. Eins og Arnar Gunnlaugsson komst að orði í viðtali eftir leik þá eru föstu leikatriðin, styrkleiki liðsins frá því fyrr í sumar, orðin að akkilesarhæl liðsins.
Bestu leikmenn
1. Rodri
Rodri skoraði bæði mörk KA og var heilt yfir góður í leiknum eins og í langflestum leikjum. Hann er kominn með þrjú mörk í sumar en hann hefur aldrei skorað meira en tvö mörk á leiktíð á Íslandi.
2. Júlíus Magnússon
Solid frammistaða hjá Júlla sóknar- og varnarlega. Lagði upp mark og kom sér reglulega fyrir tilraunir gestanna. Kristall og Dusan voru einnig mjög góðir.
Atvikið
Dauðafærið hjá Helga Guðjóns og seinna mark Rodri. Rodri tryggði stigið en mark frá Helga hefði farið ofboðslega langt með að tryggja Víkingum sigurinn. Stubbur gerði mjög vel að verja.
Hvað þýða úrslitin?
Liðin eru einu stigi nær toppliði Vals þar sem Valur tapaði. KR og Breiðablik eiga eftir að ljúka sínum leikjum.
Vondur dagur
Logi Tómasson. Það er aldrei gott að fá á sig gult spjald fyrir leikaraskap.
Dómarinn - 7,5
Mér fannst Vilhjálmur Alvar stýra leiknum mjög vel í fyrri hálfleik. Í seinni hálfleik tók óþarflega langan tíma að leysa deilur Helga Guðjóns og varnarmana KA. Drap taktinn á þeim tímapunkti.