SKÝRSLAN: Göngutúr í garðinum
Hvað réði úrslitum?
Gæði HK-inga og kraftur miklu meiri. Það hefði verið áhugavert að sjá hvernig leikurinn hefði þróast ef KFS hefði jafnað í 2-2, eins og þeir komust í stöðu til að gera. En í staðinn komst HK í 3-1 og eftir það áttu Vestmannaeyingarnir engan möguleika. Lið KFS má samt vera stolt af sínum árangri í þessari keppni, þrátt fyrir þetta stóra tap í dag. Ekkert lið úr 3. deild komst lengra en KFS.
Bestu leikmenn
1. Jón Arnar Barðdal (HK)
Mjög öflugur sem fremsti maður HK í dag. Var mjög líflegur, góður í samspilinu og fékk færi til að skora fleiri en þau tvö mörk sem hann gerði.
2. Ásgeir Marteinsson (HK)
Skoraði, rétt eins og Jón Arnar, tvö mörk. Mjög flottur leikur hjá Ásgeiri í kvöld þar sem hann skoraði meðal annars úr aukaspyrnu langt utan af velli.
Atvikið
Fyrsta markið sem Jón Arnar skoraði eftir 18 sekúndur. KFS ætlaði að koma í Kórinn og reyna að halda núllinu eins lengi og þeir gætu. Eins og Brynjar Björn sagði í viðtali eftir leik, þá hefði leikurinn getað orðið flókinn ef ekki hefði verið fyrir þetta fyrsta mark - sem kom svo snemma.
Hvað þýða úrslitin?
HK fer í átta-liða úrslitin á meðan KFS situr eftir og einbeitir sér að því að halda sér uppi í 3. deild. Það verður dregið í átta-liða úrslitin á morgun.
Vondur dagur
Varnarlína og markvörður KFS áttu ekki alveg sinn besta dag í Kórnum. Eyþór Orri Ómarsson, fremsti maður liðsins, var þá ekki í miklum takti og var orðinn mjög pirraður í seinni hálfleiknum.
Dómarinn - 7
Ekkert við hann að sakast. Vel dæmdur leikur, en svo sem ekkert mjög erfiður leikur að dæma.